Njuike sisdoaluide

Riebanbivdu gáibida dihtolágan čehppodaga, gosa bidjat juolgegiela – bivdduin geahččalit suodjalit njálaid

Riebaniid leat figgan juo jagiid geahpedit. Ohcejogas ja Eanodagas njálat leat álgán jo dihttostit.

Antti Heikkonen Ivalosta pyydystä kettuja.

Beaivi ii leat vel geargan oba čuvggoditge go avvilaš Antti Heikkonen stártesta mohtorgielkkás ja vuodjá riebanbivdui. Son lea jođus oahppat juolgegielaid, amas rieban dárbbašit badjelmeare gillát.

– Rieban lea idjaealli ja bissu ihku ráfálabbon juolgegielas. Ferte goit smiehttat dan riebanage, iige mannat easkka čuvggodettiin oahppat bivdosiid, muitalastá Heikkonen.

Riebaniid bivdet eret duoddariin vai njálla beasašii ráfis besset. Govva: Vesa Toppari / Yle

Meahciráđđehus lea maid dán dálvvi joatkán riebanbivddu Eanodaga ja Ohcejoga guovllus vai áittatvuloš njálla bállešii eallit. Stuorábun rieban rivve njálas bessensajiid ja biepmu.

Moattelogis leat dál riebanbivddus. Luonddus johttit bivdet riebaniid juogo sierra soahpamuša mielde dahje bálkáhuvvon bivdin nugomat Ohcejogas ja Eanodagas.

Rieban lea njállii vearrás gilvaleaddji. Duoddaris dat rivve njálas eallinsaji. Diibmá rieban vuhttui 34 njállabeasis dahje daid lahkosiin. Dan lassin gávcci beasis lei goivojuvvon, muhto ii leat diehtu mii lei fitnan daid dutkkadeamen.

– Rieban lea njállii ain stuorát áitta. Dat lea oassái dálkkádatrievdama sivva, ahte rieban lea ealligoahtán maid badjelabbos duoddariin. Seamma eallinbirrasis njálla ferte čáhkket, muitala bajit dárkkisteaddji Tuomo Ollila Meahciráđđehusas.

Ollila: Riebanbivddus leamaš ávki njállanállái

Riebanbivdu gáibida dihtolágan čehppodaga das, gosa juolgegiela gánneha bidjat. Antti Heikkonen fievrrida meahccái ráđu, man birra vuojesta luotta mohtorgielkkáin.

– Vuos ferte stellet ráđu ja go riebanat jorragohtet doppe, de luottaid ala stellet juolgegiela. Lágas mearriduvvo dárkilit makkár dat galgá leat. Rieban galgá beassat johtit guhkelebbui darvánanbáikkis, čilge Heikkonen.

Riebanbivdu gáibida čehppodaga diehtit gosa juolgegiela gánneha stellet. Dá Antti Heikkonen riebanbivddus. Govva: Vesa Toppari / Yle

Riebaniid leat figgan juo jagiid geahpedit. Norgga bealde leat lihkostuvvan juoga veardde ealáskahttit njállanáli. Ohcejogas ja Eanodágas njálat leat juoba dihttostan.

– Váhá juo čuovga oidnosta. Mii leat gávdnan máŋga njállabeasi, main lea ássojuvvon birra jagi. Ii mana guhká, go bessen fas lihkostuvvá, illuda Ollila.

Beaivvi ságaid ja Yle Ođđasiid Sámis sáhtát maid guldalit Yle Areenas.