Njuike sisdoaluide

Skábmagovaid panelaságastallamis guorahallet sámi searvvušlašvuođa – geahččit sáhttet oassálastit ságastallamii čátta bokte

SkábmaTALK ságastallamis leat mielde filbmadahkkit Suvi West ja Sunna Nousuniemi, doavttir Heidi Eriksen ja servodatberošteaddji Tiina Sanila-Aikio. Dárkkuhus lea ovddidit rabasvuođa sámi ja eamiálbmogiid servošis.

Visuálalaš Sápmi -fidnu prošeaktahoavda Minna Lipponen muitala, ahte Skábmagovain háliidit loktet ságastallamii searvvušlašvuođa sámi servošis. Govva: Kirsti Länsman / Yle

Duorastaga álgá fas eamiálbmogiid filbmafestivála Skábmagovat neahtas. Dábálaš filbmačájáhusaid lassin bearjadaga lágiduvvo SkábmaTALK-panelaságastallan, mas háleštit searvvušlašvuođa birra.

SkábmaTALK ságastallamis leat mielde filbmadahkkit Suvi West ja Sunna Nousuniemi, doavttir Heidi Eriksen ja sámi servodatberošteaddji Tiina Sanila-Aikio. Dáhpáhusa sáhttá geahččat nuvttá streama bokte. (siirryt toiseen palveluun) Ságastallama moderahttorin lea Áslat Holmberg.

Visuálalaš Sápmi -fidnu prošeaktahoavda Minna Lipponen Sámedáidaga doarjjasearvvis muitala, ahte sii háliidedje loktet ságastallamii sámi searvvušlašvuođa ja dan mo dat oidno.

– Jurddášeimmet, ahte olbmot galggašedje eanetge hállat dan birra ja muitalit, mo searvvuš doarju dahje sáhttá doarjut iežas ja mo mii sáhttit nannet sosiálalaš vuoimmi ja gaskavuođa ja olbmuid gullevašvuođa, muitala Lipponen.

Prošeaktahoavda Minna Lipponen muitala, ahte filbmafestivála ságastallandilálašvuođain háliidit hukset rabasvuođa sámi servošii. Govva: Kirsti Länsman / Yle

Čáttas juohkit fámu maiddái panela gehččiide

Ságastallama áigge filbmafestivála ordne čátta, masa geahččit sáhttet čálašit ja sáddet gažaldagaid. Prošeaktahoavda Minna Lipponen muitala, ahte justa koronapandemiija áigge ii leat leamašan vejolašvuohta guossástallat ja oaidnalit olbmuiguin, mii lea soaitán buktit eambbo fuones ja oktonas dovdduid.

– Vuođđojurddan lea, ahte olbmot ožžot das dákkár oktiigullevašvuođa ja besset ovdanbuktit iežaset oainnuid, váttisvuođaid ja juohkit fámu ja árvvuid ja jearrat panelisttain. Dat olbmot, geat dovdet iežaset oktonassan, sáhtášedje oažžut dás doaivvu ja doarjaga, muitala Lipponen.

Minna Lipponen jáhkká, ahte ságastallan soaitá buktit rabasvuođa dán sullasaš dovdduin olles sámi servošii.

– Sávan, ahte dat ii livččii tabu ja dasa boađášii eanet rabasvuohta ja ahte sáhtášeimmet nannet min searvvušlašvuođa dáinna ságastallamiin, dadjá Lipponen.

Filbmafestivála álgá nuvttá rahpansáddagiin duorastaga

Filbmafestivála lágiduvvo dál 24. geardde ja juo nuppe háve neahttalávddis koronapandemiija dihte.

Filbmafestivála rahpansátta sáddejuvvo otne duorastaga diibmu 18. Dan sáhttá geahččat nuvttá neahta bokte. Rahpansáddaga lágideaba Aslak Holmberg ja Hanna-Maaria Kiprianoff.

Rahpandoaluin lea vejolašvuohta oaidnit guokte oanehisfilmma HAKA Haha ja The Sashmaker ja Ánnámáreha musihkkavideo. Maiddái Yungmiqu ráppe rahpandoaluin.

Skábmagovain čájehit oktiibuot 52 filmma nu Sámis go maiddái miehtá máilmmi. Filmmat leat geahččanláhkai 27. beaivves gitta guovvamánu 6. beaivái. Festivála olles prográmma gávdno Skábmagovaid neahttasiiddus (siirryt toiseen palveluun).

Beaivvi ságaid ja Yle Ođđasiid Sámis sáhtát maid guldalit Yle Areenas.

Divvojuvvon 27.1.2022 dii. 18.26: Filmmat leat geahččanláhkai gitta guovvamánu 6. beaivái.