Njuike sisdoaluide

Lapin Kansa: Hoavvariekti gomihii gearretrievtti mearrádusa Gálddoaivvi navdojuvvon behttosáššis

Lappi gearretrievtti duomu mielde badjelolbmot bukte čearpmahiid lobi haga bálgosii. Hoavvariekti gomihii duomu, danin go áššis bázii čájetkeahtá, ahte bohccot livčče buktojuvvon nuppi bálgosis Gálddoaivve bálgosii.

Roavvenjárgga hoavvariekti gieđahalai ášši mannan jagi loahpas. Govva: Vesa Toppari / Yle

Roavvenjárgga hoavvariekti lea gomihan Lappi gearretrievtti mearrádusa, man mielde Gálddoaivve bálgosa golbma boazodoalli ledje fievrredan suoli čearpmahiid bálgosii. Sii navdojuvvojedje sivalažžan behttosii ja dubmejuvvojedje gearretrievttis skábmamánus 2020 evttolaš fáŋgalduomuide. Áššis muitala Lapin Kansa -aviisa (siirryt toiseen palveluun).

Gearretrievtti duomu mielde albmát livčče geahččalan fillet Gálddoaivve bálgosa nannet boazologahallama duohtavuođa vuostásaččat, go sii ledje suoli buktán 21 čearpmaha nuppi bálgosis Gálddoaivái.

Gearretriekti dubmii sin behttosa geahččaleamis 30 beaivvi evttolaš fáŋgalduomuide. Hoavvariekti goit lei nuppi oaivilis ja gomihii dáid evttolaš fáŋgalduomuid ja gomihii maid buhtadusmearrádusa, maid sii galge máksit bálgosii.

Hoavvarievtti mielas áššis bázii čájetkeahtá, ahte bohccot livčče buktojuvvon nuppi bálgosis Gálddoaivve bálgosii. Hoavvariekti duomustis geahčai, ahte vaikke bohccot ledje olggosoaidnit nuppeláganat ivnni, guolgamearkkaid ja go eai čuvodan áldduid, de das ii vus sáhte beassat dan oaivilii, ahte dat leat vieris bohccot ja eret bálgosa olggobealde.

Roavvenjárgga hoavvariekti gieđahalai ášši mannan jagi loahpas.

Gearretriekti mearridii máksit buhtadusaid

Lappi gearretriekti lei mearridan golbma sivalažžan navdojuvvon boazodoalli máksit logiid duháhiid euroid buhtadusaid.

Alaguoddi gáibidii badjeolbmuide duomu behttosa geahččaleamis dahje nuppisadjásaččat boazodoallorihkkumušas ja ráŋggaštussan evttolaš fáŋgavuođa dahje stuorra sáhkuid.

Bálggus lei ovttaoaivilis alaguoddi gáibádusaiguin, muhto gáibidii duomu maiddái behttosis dahje roavvá behttosis dahje dan geahččaleamis ja badjeolbmuin 27 650 euro vahátbuhtadusaid. Badjeolbmot šiite visot sivahusaid ja bálgosa gáibádusaid.

Go muhtin siidda boazolohku šaddá lobi haga, gártet eará siiddat njuovvat eanet, ja sidjiide šaddet ruđalaš vahágat boazologu geahppaneamis, duomus celkojuvvui skábamánus 2020.

Rihkkusnamahus lei dalle behttosa geahččaleapmi, danin go bálgosis leat goittotge lohkan bohccuid dan maŋŋil go lobihis buktimis šattai eahpádus ja lasihan čearpmahiid boazolohkui.

Beaivvi ságaid ja Yle Ođđasiid Sámis sáhtát maid guldalit Yle Areenas.