Njuike sisdoaluide

Heahtás lágidit lávvardaga álbmotlaš čuoiganbeaidáhpáhusa – doppe oahpahit ja rávvejit čuoigama, muhto eai gilvvohala

Čuoigandáhpáhus lágiduvvo diibmu 12–15 Hetan hiihtomaas ja Duottar-Sámi luondduguovddáža šiljus.

Enontekiön sydänyhdistyksen puheenjohtaja Pirkko Kuusela.
Eanodaga váibmosearvvi ságadoalli Pirkko Kuusela sávvá, ahte olbmot boađášedje álbmotlaš čuoiganbeaivvi lávvardaga 29.1. návddašit olgoáimmus.

Lávvardaga lágiduvvo Heahtás álbmotlaš čuoiganbeaivvi (siirryt toiseen palveluun) oassedáhpáhus. Dan lágidit ovttas Eanodaga váibmosearvi, Muoná váibmosearvi ja Heahtá Láhttu.

– Álbmotlaš čuoiganbeaivi lágiduvvo dál vuosttas geardde ja das lea plánejuvvon šaddat fásta dáhpáhus. Doppe čájehat čuoigama máŋgga láhkai, muitala ságadoalli Pirkko Kuusela Eanodaga váibmosearvvis.

Čuoigandáhpáhus lágiduvvo diibmu 12–15 Hetan hiihtomaas ja Duottar-Sámi luondduguovddáža šiljus. Dáhpáhus lea dárkkuhuvvon buohkaide. Doppe sáhttá lihkadit vaikko guđe láhkai, ovdamearkka dihtii čuoigat dábálaš sabehiiguin, vázzit muohtagápmagiiguin dahje vaikko spárket.

– Čuoiganhan lea okta máilmmi buoremus valáštallanvugiin. Dáhpáhusas oahpahit ja rávvejit čuoigama, muhto eat gilvvohala, dadjá Kuusela.

Dáhpáhusas fállet báhkka sávtta ja keavssaid, muđui juohkehaš sáhttá váldit iežasge nisttiid fárrui, amas dárbbašit guoros čovjjiin orrut. Lágideaddjit áigot ordnet dolastallansajiid, gos sáhttá vaikko bassit márffiid.

– Sávan, ahte olbmot movttáskit boahtit dáhpáhussii návddašit olgoáimmus ja min čáppá luonddus ja maiddái lihkadit, dadjá Kuusela vel lohppii.

Álbmotlaš čuoiganbeaivvi lágidit riikkaviidosaččat lávvardaga 29.1.2022. Dalle Suomen Latu miellahttosearvvit ordnejit čuoigantuvrraid miehtá Suoma. Okta oassedáhpáhus lágiduvvo maid Anára Suoločielggis (siirryt toiseen palveluun).

Beaivvi ságaid ja Yle Ođđasiid Sámis sáhtát maid guldalit Yle Areenas.