Njuike sisdoaluide

Duohtavuođa- ja soabadankommišuvnna čállingotti plánejeaddji virggiid ohce 13 olbmo

Čállingoddái gullet golbma plánejeaddji ja váldočálli.

Duohtavuođa- ja soabadankommišuvnna čállingoddi álggaha barggus nu johtilit go vejolaš. Govva: Vesa Toppari / Yle

Suoma stáhtaráđđi lea ožžon oktiibut 13 ohcamuša Sámiid duohtavuođa- ja soabadankommišuvnna plánejeaddji virggiide. Kommišuvnna čállingotti várás bálkkáhit golbma plánejeaddji ja váldočálli. Ohcanáigi plánejeaddji virggiide nogai gaskavahko.

Virggiide ohce Martta Alajärvi, Inari Alanko, Johanna Hossa, Katariina Juhola, Vilma Kallio, Henna Kröger, Antti Kuningas, Virpi Lehtinen, Aslak Länsman, Laura Morottaja, Jukka Pelli ja Maija Tulimaa. Okta ohcci ii hálit namas almmolašvuhtii.

Dál čuovovažžan kommišuvdna ovttas stáhtaráđi kansliija ovddasteaddjiin bargagohtet válljejumiiguin. Sin ulbmilin lea beassat jearahallat ohcciid jo guovvamánu álggus, muitala stáhtaráđi kansliija spesiálaáššedovdi Maija Räsänen.

– Leat geargan vilppastit jo ohcamušaid, ja dan vuođul orru leamen nu, ahte doppe leat dan bargui heivvolaš olbmot, lohká Räsänen.

Maiddái duohtavuođa- ja soabadankommišuvnna váldočálli virgái eai leat vel mearredan olbmo. Váldočálli virggi ohce gávccis. Váldočálli doaibmá čállingotti jođiheaddjin.

Plánejeddjiid bargguide gullá earret eará almmolaš hálddahuslašdoaimmat, dego ekonomiija- ja mátkehálddašeapmi, ja ollašuhttima koordineren ovttas váldočálliin. Dasa lassin plánejeaddjit fuolahit maid kommišuvnna siskkáldas ja olgguldas gulahallama plánemis.

Stáhtaráđđi ii vuos dieđe, goas mearrádusat virggiid birra bohtet. Spesialaáššedovdi Maija Räsänen goittotge sávvá, ahte válljejumit dahkkojuvvošedje nu johtilit go vejolaš.

– Guktuid virggiid oasil geahččalat ovdánit beaktilit, vai čállingoddi beasašii álggahit barggus.

Beaivvi ságaid ja Yle Ođđasiid Sámis sáhtát maid guldalit Yle Areenas.