Njuike sisdoaluide

Ánnámáreha Nieguid duovdagat válljejuvvon jagi 2021 álbmotmusihkkaskearrun – “Addá doaivaga ja buktá ilu”

Koronapandemiija geažil musihkkár Anna Näkkäläjärvi-Länsman joavkkuinis ii leat beassan olus lávddi ala ovdanbuktit iežas ođđa musihka. Sámi álbmotbeaivve Ánnámáret beassá goit čuojahit Tamperes.

Ánnámáret joavkkuinis illuda boahttevaš vahkkolohppii ja Sámi álbmotbeaivái, go viimmat besset njuiket lávdde ala ja čuojahit ođđa musihka. Govva: Karoliina Juhola

Suoma álbmotmusihka suorgi lea juohkán Eläköön Folk -dovddastusaid musihkkáriidda ja eará álbmotmusihkkadoaibmiide. Jagi 2021 álbmotmusihkkaskearrun lea válljejuvvon Ánnámáret dahje Anna Näkkäläjärvi-Länsman ođđaseamos skearru Nieguid duovdagat.

Sámemusihkkárii dán lágán dovddastus lea hui stuorra ášši.

– Lea hui giitevaš dovdu, ahte mu ja bargojoavkku bargu lea ožžon dákkár dovddastusa ja fuomášumi. Ahte mii leat ráhkadan dákkár musihkka, mii lea ánssášan dán bálkkašumi. Dat orru, ahte lea lihkosmuvvan, dadjá Anna Näkkäläjärvi-Länsman.

Nieguid duovdagat -skearru almmustuvai diibmá Sámi álbmotbeaivve. Koronapandemiija geažil Näkkäläjärvi-Länsman joavkkuinis ii leat goit beassan olus lávddi ala ovdanbuktit iežas ođđa musihka. Olu konsearttat leat šluhttejuvvon korona geažil, muitala Näkkäläjärvi-Länsman.

– Dat duššástuhttá ja boahtá dakkár dovdu, ahte maid mun dás iskkan. Dat, ahte beassá olbmuiguin bargat, deaivat musihkkáriid ja mii beassat čuojahit ovttas, dat lea buot somámus dán barggus. Dat ovttas čuojaheapmi lea dego lákca gáhkus, dadjá Näkkäläjärvi-Länsman.

Bálkkašumit ja dovddastus goit veahkehit váttis áiggi čađa.

– Beahttašumit leat gal leamašan olu, muhto de go fidne bálkkašumi, de dat addá fas dakkár earálágan doaivaga ja buktá ilu, dadjá Näkkäläjärvi-Länsman.

Sámi álbmotbeaivve Ánnámáret njuike viimmat lávdde ala

Ánnámáreha Nieguid duovdagat lea evttohassan maid Emma bálkkašupmái Etno Emma -kategoriijas. Emma-gála galggai lágiduvvot dán vahkkoloahpas, muhto korona dili dihte dáhpáhus lea sirdojuvvon miessemánnui. Näkkäläjärvi-Länsman gal áigu joavkkuinis dollet gálai.

– Dat lea hui stuorra ášši, ahte mii leat evttohassan. Lea stuorra dovddastus leat mielde das ja lea hui gelddolaš beassat oaidnit, ahte gii dan oažžu. Gilvu lea garas ja midjiide gal lea vuoitun, ahte mii leat das evttohassan.

Ánnámáret joavkkuinis illuda boahttevaš vahkkolohppii ja Sámi álbmotbeaivái, go viimmat besset njuiket lávdde ala Tampere G Livelab -klubbas. Guhká leamašan eahpesihkkarvuohta, ahte beasságo joavku čuojahit ollenge korona geažil, muhto dál lágideaddjit leat nannen, ahte konsearta ollašuvvá.

– Mii áigut váldit moadde ođđa luođi Tampere konsearttas. Hui somá beassat daid olbmuide juoigat ja čuojahit. Dat addá movtta ja dat maid movttiidahttá, ahte beassá lávddi ala. Gal dat lea dán barggus okta deháleamos ášši, illuda Näkkäläjärvi-Länsman.

Sámemusihkkár ii leat vuollánan pandemiija geažil ja jurdagat leatge juo boahttevaš prošeavttain. Näkkäläjärvi-Länsman lea olles áigge bargame Sibelius-Akademiijai dáiddalaš doavttirprošeavtta.

– Mus lea das konsearta miessemánus, mas lea aivve ođđa prográmma ja ođđa joavku maiddái. Mii bargat maid dán jagi mielde Nieguid duovdagat-joavkkuin ja mii leat ođđa musihka ráhkadeame. Hui suohtas gal lea go beassá fas ovddasguvlui bargat, dadjá Anna Näkkäläjärvi-Länsman.

Sámemusihkkár Anna Näkkäläjärvi-Länsman dadjá, ahte dovddastus ja bálkkašumit veahkehit váttis áiggiid čađa ja buktet doaivaga.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat