Dánsaoahpaheaddji Anna-Maria Paadar gilvvohalai sotnabeaivve 27.2. Nelonen-kanálas sáddejuvvon The Voice of Finland -gilvvus. Paadar lávllui Lady Gaga šuoŋa Look what I found, muhto ii beassan gilvvus viidáset.
– Šuokŋa lea váttis ja lean hui duđavaš dasa mot dat manai. Dieđus dalle ledjen behtton go in beassan viidáset, muhto lean beassan dan badjel ja eallin joatkašuvvá – ja lávlun joatkašuvvá, lohká Paadar.
Prográmma lea báddejuvvon ovdal jahkemolsašumi ja Paadar lohkáge, ahte dál go prográmma geahčai, dovddut ledje seammaláganat go dalle gilvvus.
– Gal mun ikte ellen ođđasit daid seamma dovdduid dan moatte minuhtas.
Niehkun hyhtta Njellimis
Anna Maria Paadar lea eret Lappeenrantas ja oahpaha Lappeenranta dánsaskuvllas dánsuma. Su máttut goittotge leat davvin. Paadar áhkku lea eret Njellima gilážis Anára gielddas. Su niehkun leage, ahte muhtin beaivve sus livččii hyhtta Njellima guovllus.
– Álot go leat doppe fitnan, nu gal dat davvi lea váimmus ja varas maid. Gal dan dovdá.
Geasset Paadar sáhttá oaidnit Vantaa geasseteáhteris Backas šaddogárddis, gos lea musihkkateáhterbihttá Olen suomalainen, mii muitala musihkkár Kari Tapio birra.
Paadar áigu joatkit maid lávluma ja son lohkáge, ahte Voice of Finland vásáhusa maŋŋá su mielas orru, ahte son háliida lávlut ain eanet.
– Motnu dat go beassá riikaviidosaš tv:ai, de das boahtá dakkár dovdu, ahte gal mun dán máhtán, dego ovdalge lean jurddašan, ahte eanet dahje unnit máhtán lávlut. Dál jurddašan, ahte go lean beassan duokkár hommái mielde, de bures manná, Paadar muitala.
The Voice of Finland lea lávlungilvu, gos gilvvohallit lávlot ja duopmárat čohkkájit selggolassii lávlui ja gullet dušše jiena. Jus duopmárat liikojit lávlumii, de sii sáhttet deaddilit boalu, mii jorgala duopmára stuolu ja sii besset oaidnit maid gilvvohalli. Jus muhtin duopmár lea deaddilan boalu, de gilvvohalli manná su jovkui ja duopmár skuvle gilvvohalli. Jus máŋga duopmára deaddilit boalu, de gilvvohalli beassá válljet gean jovkui manná.
Duopmárin The Voice of Finlandis leat lávlu Maija Vilkkumaa, Apulanta-joavkku Toni Virtanen ja Sipe Santapukki, lávlu Anna Puu ja lávlu Juha Tapio. Vaikko gilvvus duopmáriin leat joavkkut, nu loahpaloahpas buot gilvvohallit goittotge gilvalit gaskaneaset.
Beaivvi ságaid ja Yle Ođđasiid Sámis sáhtát maid guldalit Yle Areenas.
