Njuike sisdoaluide

NRK: Sámepolitihkkár Sandra Andersen Eira gullá riikkaidgaskasaš jovkui, mii dáistala soađis Ukraina beales: "Dát lea diđolaš válljen"

NRK ođđasis Andersen Eira muitala, ahte son lea gárvvis báhčit. Son ii muitalan iežas váhnemiidda, ahte vuolgá soahtái, go ii háliidan fuolastuhttit sudno.

Go dát govva váldojuvvui Lvivis, lei Sandra Andersen Eira joavkkut jerrojuvvon vuolgit máttás ja Kiovai. Govva: Gunnar Bratthammer/NRK

Go vulggii riikkaidgaskasaš guovlobealuštanlegionii Ukrainai, ii porsáŋgulaš Sandra Andersen Eira muitalan iežas váhnemiidda das maidege. Dál son oahpahallá dárkilis báhčima, muitala NRK (siirryt toiseen palveluun).

35-jahkásaš Sandra Andersen Eira lea sámepolitihkkár, gii lei ovddeš válgabajis Norgga Sámedikki áirras. Su birra lea čállán maiddái Ávvir (siirryt toiseen palveluun).

Andersen Eira vulggii vuos legionii lagašdivššárin, muhto dan maŋŋá doaimmat leat šaddan eanet ja ain garrasabbon.

– Dan maŋŋá lean ožžon skuvlejumi eará doaimmaide. Sáhtán dádjat, ahte mu favorihtta lea báhčinhárjehallan, muitala son.

Sandra Andersen Eira govvejuvvon Lvivis, man ruoššat leat fallehan oalle unnán. Govva: Gunnar Bratthammer/NRK

Son ii muitalan iežas váhnemiidda ahte lea vuolgimin, daningo ii háliidan fuolastuhttit sudno. Muđuige sutnje lei dehálaš, ahte beassá ráfis vuodjut doaimmaide Ukrainas.

– Muhto in eahpádallan, in veaháge. Iige leat dasge eahpádus, ahte in livčče dáppe gitta loahpa rádjái.

Báhčin gullá dán bargui

Sandra Andersen Eira lohká NRK:i, ahte báhčin gullá legionalačča doibmii ja dasa son lea maiddái ráhkkanan.

– Dat lea oassi dán barggus. Dat lea oassi soađis. Dat lea nu mo lea. Juogo mii dahkat dan dahje sii. Joavkun mii bargat buot buoremusa nuppiideamet suodjaleames, vástida son.

Joavku, masa Andersen Eira gullá, lea riikkaidgaskasaš guovlobealuštanlegionas. Das eanemus oassi olbmuin leat amerihkálaš spesiálasoalddáhat. Ukraina presideanta Volodymyr Zelenskyi ásahii legiona guovvamánu loahpas.

Andersen Eira árvala, ahte su olles eallin gitta mánnávuođa rájes lea dolvon su dál Ukrainai.

– Dát lea diđolaš válljen. Mus lei morálalaš geatnegasvuohta dahkat dán, muitala son.

Sutnje dehálamos lea dál Ukraina boahttevuohta. Govva: Gunnar Bratthammer/NRK

Andresen Eira lohká NRK:i diehtit, ahte dilli lea duohta váralaš. Doaibma lea daninge váttis, go sii eai dovdda Ukraina eatnamiid seamma láhkái go báikkálaččat.

– Mii dárbbašit lasi báhčinvearjjuid. Ukraina lea oalát sorjavaš eará riikkaid veahkis dán ektui. Ruoššas leat olu garrasot áibmosoahtefámut, čilge son.

Ruošša doaimmat motiverejit dáistalit Ukraina beales

– Soahti lea soahti. Nissonat ja mánát báhččojuvvojit gáhta ala. Ruoššalaš soahteveahka bombe buohcceviesuid ja skuvllaid. Dat addá midjiide motivašuvnna doaibmat sin vuostá, lohká Sandra Andersen Eira NRK jearahallamis.

Eambbo son ii háliit muitalit das, maid son lea dahkan dahje oaidnán soađis.

Sandra Andersen Eira muitala várrebealuštanministtar Hanna Maljarii, ahte ii dieđe nu olu Krim dáhpáhusain jagis 2014. Govva: Gunnar Bratthammer/NRK

– Mun lean davvin eret. Dat lea min ránnjáriika. Oktii sii veahkehedje min friddjan, muhto dál mii soahtat sin vuostá.

NRK lei mielde maiddái preassadilálašvuođas, man ordnii Ukraina várrebealuštanministtar Hanna Maljar Lvivis.

– Sandra inspirere min iežas energiijain ja motivašuvnnain bargat ja doarjut min soađis. Mii leat hui giitevaččat, ministtar dadjá.