Njuike sisdoaluide

Kuldâl jienâ: Anarâškielâ luuhâm káidusin kiäsut jyehi ive eenâb uáppeid

Sämikielâi káidusmáttááttâshaavâst puáhtá luuhâđ káidusin nuorttâlâš-, anarâš- teikkâ tavesämikielâ. Puáttee luuhâmihán láá almottâttâm ohtsis 160 uápped.

Anarâškielâ máttáátteijee Henna Aikio illood, ko sämikielâi luuhâm kiäsut pirrâ Suomâ. Govva: Henna Aikio / priivaat kove
Kuldâl maid sämikielâi káidusmáttááttâshaavâ anarâškielâ máttáátteijee Henna Aikio muštâl anarâškielâ uáppein já puáttee luuhâmivveest. Toimâtteijen Sáárá Seipiharju.

Anarâškielâ lii puáhtám luuhâđ forgâ jo nelji ive káidusin. Sämikielâi káidusmáttááttâshaavâst mana pyereest, ko jyehi ive máttááttâsâst algâtteh ain eenâb já eenâb uáppeeh. Haahâ fáálá máttááttâs vuáđuškoovlâ já luvâttuv uáppeid.

Anarâškielâ uáppeeh láá tääl ohtsis kulmâlov já puáttee ihán láá almottâttâm 38 uápped, muštâl anarâškielâ máttáátteijee Henna Aikio.

Ohtsis puáttee luuhâmihán láá almottâttâm 160 uápped luuhâđ nuorttâlâš-, anarâš- teikkâ tavesämikielâ. Haahâ aalgij ive 2018 já talle uáppeeh lijjii ohtsis tuše 50.

Taan ive anarâškielâ máttááttâsâst láá fáárust vuossâmuu tove meid eenikielâg uáppeeh. Eenikielâgij juávhu lasseen Aikio máttát meid anarâškielâ nubben kiellân.

Aikio uáiná pyerrin äššin tom, ete pirrâ Suomâ ulmuuh tietih sii haavâst. Fastâruttâdem kuittâg váilu ain já tot toovât čuolmâid.

– Čuolmâ lii tot, ete ruttâdem ij lah lasanâm siämmáá jotelávt ko uáppei meeri. Máttáátteijei já uáppei uáinust tääl láá juávhuh, moin uáppei kielâtääsi ij lah siämmáá tääsist.

Uáppeeh láá moovtah, veikkâ rävisulmuuh imâštâleh

Henna Aikio lii porgâm káidusmáttááttâshaavâst nelji ive. Puáttee luuhâmive sun ij kuittâg pyevti juátkiđ.

– Ko ij lah fastâruttâdem, te mun jiem finnii innig virgeluámu muu fastâpargosaajeest, te koolgâm maccâđ muu fastâpargon suomâkielâ eenikielâmáttáátteijen.

Aikio áigu kuittâg uuccâđ sierâ love vâi uážuččij máttááttiđ kyevti luvâttuv abiturient toos räi, ete suoi uážžuv vielgis kappeer uáiván já tuođâštus anarâškielâ pajeuáppeeiskosist.

Pyeremus äšši káidusmáttááttâsâst lii uáppei mohtâ, muštâl Aikio.

– Sij iä peerust, ete mij lep káidusin, veikkâ rävisulmuuh motomin tom imâštâleh. Párnááh láá iloliih já puátih hirmâd mielâstis sämitiijmán já tot kale ilosmit muu jyehi peeivi.

Kuldâl lase anarâš saavâid tääbbin.