Njuike sisdoaluide

Kuvddâl jiõn: Õõlmâs jååttlõk lij ǩeäppnam Aanrest, da tõnt ââʹn oouʹdeeškuäʹđet pääiklaž oummi vuäittmõõžžid jååttmõʹšše

Aanar kåʹdd lij ââʹn ǩeâšttjâʹttmen äʹššlažjååttlõõǥǥ kååʹdd nuõrttvueʹzzin. Täävtõssân lij viikkâd ooudâs še õõlmâs jååttlõõǥǥ škooulniiʹǩǩid ja tuâjjlaid siidi kõõskâst.

Aanar kååʹdd oouʹdeemkoordinaattor Marja Männistö mieʹldd Aanrest lie vuäittmõõžž vuäǯǯâd še jeänab õõlmâs jååttlõõǥǥ. Govva: Sara Kelemeny / Yle

Kuʹǩes maaʹtǩi Aanar kååʹddest oouʹdeet ââʹn õõlmâs jååttlõõǥǥ. Kåʹdd lij ǩeâšttjâttam äʹššlažjååttlõõǥǥ Päärtõõǥǥ da Njauddâm di Njeäʹllem-Âʹvvel kõõskâst.

Uuʹccab siidin lie piâssâm jååʹtted õõut vuâra neäʹttlest kääzzkõõzzi årra, leâša tõn lââʹssen kåʹdd äigg oouʹdeeškueʹtted tuâjj- da škooulmaaʹtǩid. Vuõssmõs läuʹǩǩ lij juʹn valddum, mušttal Aanar kååʹdd ooudâsviikkâmkoordinaattor Marja Männistö.

– Õõlmâs jååttlõk lij ǩeäppnam jiânnai Aanar čårrsiidin, da tõnt Aanrest haaʹleet oouʹdeed pääiklaž oummi jååttlõõǥǥ, što škooulneeʹǩǩ, mättʼtõõtti da tuâjjla peäʹsse jååʹtted da hoiʹddjed sij aaʹššid. Õhtt ođđ linjj lij Suâlčiõʹlj, Laanila da Âʹvvel kõskksaž tueʹlesbusslinjj, mušttal Männistö.

Aanrest lie kuʹǩes kõõsk kääzzkõõzzi årra da õõlmâs jååttlõõǥǥ lie pâi ǩieʹppääm di ǩieʹppääm. Aanar kåʹdd lij siõmmnai siõmmnai oouʹdeʹmmen õõlmâs jååttlõõǥǥ nuʹtt, što tõt kääzzkâstt pueʹrben škooulniiʹǩǩid da tuâjjmäätklaid še.

Tän poodd Aanrest lie äʹššeemõhttvuõđ tåʹlǩ Njeʹǯǯjääuʹr–Njauddâm, Aʹŋŋel–Aanar di Lisma–Aanar kõõskin. Måtam siidin õhttvuõđ lie leämmaž samai õnnum, da tõnt õhttvuõđid âlgg viikkâd ââʹn ooudâs.

– Njauddmest lij juõʹǩǩ neäʹttel tiudd autt da måtmešt lie õlggâm lââʹssaautid tiʹllʼjed äʹššlaid. Ââʹn tän õhttvuõđ veeideet Päärtõõǥǥ räjja, koʹst oummu lie tuäivvam piâssâd mieʹldd. Tän vuuʹdest lie jiânnai oummu, koin jie leäkku jiijjâz aaut, särnn Männistö.

Måtam siidin äʹššla jie leäkku teänab âânnam õhttvuõđ ni vooʹps da Aʹŋŋel di Lisma õhttvuõđid Aanra feʹrttji looppted tän ǩiiđ.

Kåʹdd lij vaalmâš oouʹdeed jeänab di jeänab õõlmâs jååttlõõǥǥ

Mââimõs määnpõõʹji ääiʹj Lääʹddjânnmest energiahââʹdd lie pâjjnam. Ouddmiârkkân puäʹlddemaunnsin lie leämmaž kõrr hââʹdd tälvvmannu rääʹjest.

Aanar kååʹddest lie iiʹjji mieʹldd siõmmna saǥstõõllâm tõʹst, leʹčči-a ouddmiârkkân siidi kõõsk vueiʹtlvaž riâššâd õõlmâs jååttlõõǥǥ. Ââʹn kåʹdd lij tõõzz vaalmâš.

– Leäʹp valmmšen viikkâd õhttvuõđid ooudâs taarb mieʹldd, jõs siidi oummuin puätt maacctõs tõʹst, što pääiklaž jååttlõõǥǥ âlgg vuäǯǯâd tåimmad.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.