Njuike sisdoaluide

Duohtavuođa- ja soabadankommišuvnna čállingoddi doarju earránan komissára Miina Seurujärvi oainnuid – eará komissárat hirpmástuvvan

Diehtu Seurujärvi earráneamis bođii vuorddekeahttá eará komissáraide. Kommišuvnna čállingoddi goittotge ádde bures, manin Seurujärvi mearridii cealkit iežas eret.

Sámiid duohtavuođa- ja soabadankommišuvnna váldočálli Ánneristen Juuso doarju earránan komissára Miina Seurujärvi. Govva: Satu Mali

Duohtavuođa- ja soabadallankommišuvnna komissára ja gieskat kommišuvnna ságadoallin álggahan Miina Seurujärvi almmuhii vuossárgga eahkedis, ahte son cealká iežas eret komissára luohttámušdoaimmas.

Dát diehtu bođii vuorddekeahttá eará komissáraide. Kommišuvnna čállingoddi goittot ádde bures, manin Seurujärvi mearridii heaitit.

Seurujärvi mielas kommišuvdna ii bastte ollašuhttit dasa addojuvvon váttes barggu. Son oaidná, ahte ollisvuohta ii leat doaibman, ja kommišuvnnas váilot sihke resurssat, muhto maiddái proseassa ja sámiid gudnejahttin. Seurujärvi mielas kommišuvnna barggu galggašii gaskkalduhttit ja plánet ođđasit.

Váldočálli Ánneristen Juuso doarju Seurujärvi oaiviliid ja mieđiha, ahte čuoččuhusat dollet deaivása.

– Mun gal vuolláičálán daid visot ieš. Oainnán, ahte kommišuvdna lea šaddan dakkár dillái, ahte dáinna kommišuvnnain ovttaskas sápmelaš šaddá eanet gillát, go maid kommišuvdna sáhttá buktit sámiide buori, oaivvilda Juuso.

Váldočállis ja čállingottis ii leat jáhkku dasa, ahte kommišuvdna nagoda čađahit barggu dakkár čatnašumiin ja vuollegisvuođain, maid dat gáibida.

Sámit leat buktán ovdan eahpeluohttámuša sihke prosessii ja komissáraide juo ovdal go kommišuvdna álggahii barggus. Juuso dadjá, ahte eahpeluohttámuš lea bohciidahttán dovdduid ja juoba suhtu komissáraid gaskkas.

– Luohttámuš laktása nu máŋgga áššái. Čállingottis lea fuolla, ahte juos diekkár áššiin boahtá suhttu, nu leatgo sii gergosat deaivat ovttaskas sápmelaččain ja váldit su vásáhusa nu mo son muitala ja bastetgo sii dohkkehit dan, smiehtada Juuso.

Juuso: kommišuvnna barggu galgá bissehit

Ánneristen Juuso lea ovttaoaivilis Miina Seurujärviin das, ahte kommišuvnna bargu ii galgga joatkašuvvat ja dan galgá bissehit. Son maiddái sávvá, ahte sápmelaččat dustet dadjat iežaset oaivila áššái.

– Dat galgá leat sámiid proseassa, sámiid buorrin.

Juuso lea šaddan guorahallat maiddái dan joatkágo kommišuvnna čállingottis.

– Mus lea vejolaš vuolgit ja mun boađán dan dahkat, juos dasa lea dárbu man nu sivas. Mun háliidan doarjut dán dilis čállingotti, geahččalit váldit gulul ja geahččat, mii dás geavvá.

Guldal kommišuvnna váldočálli Ánneristen Juuso olles jearahallama dás. Doaimmaheaddjin Sáárá Seipiharju.

Komissáraide eretcealkin lei šohkka

Eará komissárat eai máhttán vuordit, ahte Seurujärvi cealká iežas eret kommišuvnnas. Sii deattuhit, ahte kommišuvnna joatkaga guorahallá Sámediggi, gean nammadan komissára Seurujärvi lei.

– Dál vuordit Sámedikki reakšuvnnaid ja cealkámuša, ahte mo dás ovddosguvlui. Mii leat dál vuordimen, muhto ieš dat bargu lea easkka álgimen, dadjá komissára Hannele Pokka.

Komissára Irja Jefremoffii Seurujärvi almmuhus lei šohkka. Jefremoff muitala, mo kommišuvdna lei gárvvis gieđahallat Seurujärvi lokten fuolaid boahtteáiggis, muhto eai geargan dan dál dahkat.

– Livččen sávvan eanet oskkáldasvuođa eará komissáraid guvlui. Son buvttii ovdan áššiid, mat ledje easkka válmmaštallama vuolde. Ieš in bija jearaldatvuložin komissáraid čatnašumi dan bargui, mii midjiide lea addojuvvon, oaidná Jefremoff.

Komissárat eai oainne vejolažžan dan, ahte kommišuvnna bargu eahpelihkostuvašii.

– Gal mun jurddašan ja jáhkán, ahte mii nagodat dán barggu bargat. Áigetávval lea čavga, resurssat unnán, muhto mii leat easkka álggus, dadjá komissára Kari Mäkinen.

Sámiid duohtavuođa- ja soabadankommišuvnna álggahii barggustis golggotmánus 2021. Govva: Juha Kauppinen

Irja Jefremoff jáhkká, ahte sii galget dál vehá áiggi vuordit ovdalgo jotket barggu. Sii maiddái dárbbašit rávvagiid boahttevuođas sis, geat leat sin bargui ásahan. Dilli lea dál dat, ahte kommišuvnnas váilu ságadoalli.

– Mii dárbbašit dál ráđi dain, geat leat ásahan min dán bargui. Jáhkán buohkat guorahallet ja bidjet áiggi dál dasa, mo čielggadit áššiid, dadjá Jefremoff.

Váldočálli Ánneristen Juuso vávjá vásáhusaidis vuođul, ahte komissárain ii oro leamen doarvái áigi kommišuvnna bargguide. Juuso ákkastallá fuolas ovdamearkkain, man mielde okta komissára lea várren dušše golbma beaivvi mánus kommišuvnna várás. Komissárat eai oainne ášši nu.

– Mun jáhkán, ahte buot komissárat leat juo ovdal ásaheami ja kommišuvnna áigge bargan olu dan ovdii ja viggan vuodjut, nu sisdoalu go maiddái áiggi dáfus dasa. Mun in leat fuomášan, ahte ii livčče lean hállu bidjat návccaid dán bargui, dadjá Mäkinen.

Sámedikki ságadoalli Tuomas Aslak Juuso ii vel dán muttus hálit kommenteret ášši. Maiddái stáhtaráđi kansliijas eai kommentere.

Beaivvi ságaid ja Yle Ođđasiid Sámis sáhtát maid guldalit Yle Areenas.

11.5.2022 dii.10:45 Ánneristen Juuso namma divvojuvvon sámegielat hápmái.