Njuike sisdoaluide

Čuovo Eurovišuvnnaid sámegiel láidestemiin – duorastaga semifinálas čielgá, bessetgo Suopma ja Ruoŧŧa finálii

Norga beasai jo finálii ja otne duorastaga čielgá, mo geavvá Supmii ja Ruŧŧii. Sámegiel sáddaga sáhttá geahččat Yle Areenas miehtá máilmmi.

Heli Huovinen ja Aslak Paltto
Dán jagi Eurovision-lávlungilvvu sáhttá čuovvut maid sámegillii. Láidesteaddjin leaba Heli Huovinen ja Aslak Paltto.

Otne duorastaga sáddejuvvo Eurovišuvnnaid nubbi semifinála, mas Suopma ja Ruoŧŧa leat maiddái mielde. Sáddaga sáhttá čuovvut sámegiel láidestemiin Yle Areenas. Dat lea oaidninláhkai miehtá máilmmi. Sámegiel sátta sáddejuvvo maiddái Yle Sámi radios.

Maŋŋebárgga sáddejuvvon vuosttas semifinála sámegiel sáddaga čuvvo máŋga duhát geahčči. Eurovišuvnnaid finála sáddejuvvo lávvardaga.

Eurovišuvnnaid láidesteaba Aslak Paltto davvisámegillii ja Heli Huovinen anárašgillii. Láidesteaddji guovttos leaba movtta go beassaba láidestit Eurovišuvnnaid sámegillii vuosttas háve goassige.

– Norga beasai jo finálii ja otne duorastaga oaidnit, mo geavvá Supmii ja Ruŧŧii.

Eurovišuvnnaid lágidit Itália Torinos 10.–14.5. Buot sáddagiid sáhttá čuovvut Yle kanálain ja Yle Areenas diibmu 22 ovddosguvlui.

Beaivvi ságaid ja Yle Ođđasiid Sámis sáhtát maid guldalit Yle Areenas.