Njuike sisdoaluide

Komissaar iäránem já tuotâvuotâ- já sovâdâttâmkomissio vädisvuođah pyehtih maaŋgâlágánijd tobdoid – Anu Avaskari: "Viehâ stuorrâ pettâšume tot lii"

Sämitige jeessân ja Anarâšah-seervi saavâjođetteijee Anu Avaskari kuittâg tuáivu, ete komissio pargo juátkoo. Sun uáiná, ete oovdiš komissaar Miina Seurujärvi iäránem aagâid ferttee väldiđ tuođâst.

Anu Avaskari lii sorolâš tast, ete kuhháá valmâštâllum komissio pargo ij lah álgám nuuvt maht lijjii vuárdám. Govva: Vesa Toppari / Yle
Kuldâl mondiet oovdiš komissaar Miina Seurujärvi vuolgij sämmilij tuotâvuotâ- já sovâdâttâmkomissiost. Toimâtteijen Sáárá Seipiharju.

Sämmilij tuotâvuotâ- já sovâdâttâmkomissio komissaar Miina Seurujärvi iäránij taan oho vuossaargâ luáttámušpargostis komissiost.

Seurujärvi ij uáini, ete komissio pasta olášuttiđ toos adelum vaigâdis pargo. Suu mielâst komissio olesvuotâ ij lah toimâm já noomât maaŋgâid vädisvuođâid komissio pargoost. Resursij vänivuođâ lasseen čuolmân lii meid kunnijâttem váilum já sun pala, ete ovtâskâs sämmiliih vahâgittojeh prosesáin.

Komissio váldučällee Ánneristen Juuso muštâl, ete sehe sun já ubâ čäällimkodde tuárjuh Seurujärvi já nannejeh Seurujärvi tiäđuid komissio vädisvuođâin.

Seurujärvi já Juuso lává kuohtuuh ton uáinust, ete komissio pargo ij koolgâ jotkuđ já tom kalga koskâlduttiđ. Meid Suomâ Sämitige saavâjođetteijee Tuomas-Aslak Juuso tiädut, ete tääl lii tehálâš väldiđ puudâ tuotâvuotâ- já sovâdâttâmkomissiost já čielgâdiđ, mii komissio tile tuođâi lii. Suu mielâst nubástusâid ferttee porgâđ. Meid staatârääđi kanslia spesiaaläššitobdee Nina Brander lii huolâst komissio tiileest já staatârääđist väldih ääši tuođâst.

Sämitige jeessân ja Anarâšah-seervi saavâjođetteijee Anu Avaskari lii sorolâš, ete komissio pargo ij lah álgám nuuvt maht lijjii vuárdám.

– Táváliih sämmiliih láá vuárdám ennuv komissio pargo. Viehâ stuorrâ pettâšume tot lii, ete tääl komissiost oro lemin monniilágán kriisâ.

"Tuáivum, ete pargo juátkoo kuittâg mahtnii"

Anu Avaskari mielâst Miina Seurujärvist láá tuođâliih aagah, mondiet sun iärrán, já taid ferttee meid väldiđ tuođâlávt.

– Mutâ liččim tuáivum, ete komissio liččii kieđâvuššâm taid aašijd komissio siste. Taah láá tuođâliih ääših, mutâ tuáivum, ete pargo juátkoo kuittâg mahtnii.

Sun uáiná, ete pargo ovdánem váátá kuittâg luáttámuš komissaaráid ja ubâ komission.

Avaskari muštâl, ete sij iä lah kiergânâm val seervi siste savâstâllâđ uđđâsist. Sij uásálistii kuittâg vyesimáánu aalgâst komissio ornim seervij kuullâmtilálâšvuotân.

Kuldâl maid Sämitige jeessân ja Anarâšah seervi saavâjođetteijee Anu Avaskari juurdâš Seurujärvi iärránmist. Toimâtteijen Anja Kaarret.

Kuldâl lase anarâš saavâid tääbbin.