Njuike sisdoaluide

Guldal jiena: Norgga ja Suoma beale sámiid duohtavuođa- ja soabadankommišuvnnain mealgat stuorra earru bušeahtain

Norgga beale duohtavuođa- ja soabadankommišuvnna lahttu Liv Inger Somby jáhkká, ahte iešguđet kommišuvnnat sáhttet doarjut nuppiideaset fuolakeahttá praktihkalaš earuin.

Norgga duohtavuođa- ja seanadankommišuvnna lahtut Liv Inger Somby, Dagfinn Høybråten, Anne Kalstad Mikkelsen ja Per Oscar Kjølaas. Govva: Laila Lanes / NRK

Duohtavuođa- ja soabadanproseassa sámiid ja stáhta gaskkas leat jođus maid ránnjáriikkain Norggas ja Ruoŧas. Norgga beale kommišuvdna gieđahallá dáruiduhttima viidábut maiddái earret eará kvenaid oasil.

Suoma beale sámiid duohtavuođa- ja soabadankommišuvnna oktan čuolbman lea šaddan resurssaid vátnivuohta. Kommišuvnna áigemearrin oažžut loahpparaportta gárvvisin lea biddjon sullii guokte jagi.

Duohtavuođa- ja soabadanproseassa olles bušeahtta lea sullii 2,8 miljon euro, mas loahpaloahpas dušše moadde čuohteduhát euro báhcá kommišuvnna geavahussii. Stáhta mearreruđas stuorra oassi lea mannan byrokratiijai ja barggu álggaheapmái. Dán seamma bušeahtas ruhtaduvvo maiddái oassi psykososiálalaš doarjjaovttadagas.

Norgga kommišuvnnas eanet áigi ja ruhta go Suomas

Norggas dát bargu lea vuolgán johtui jo jagis 2018. Álgoálggus ulbmilin lei gárvet loahpparaportta njealji jagis, muhto koronapandemiija geažil ožžo vel jagi lasseáiggi. Ođđa áigemearri loahpparaportii lea geassemánu álgu jagis 2023.

Norgga kommišuvnna bušeahta lea 10 miljovnna Norgga ruvnnu, nappo 1,1 miljon euro juohke jagi. Ruhta lea ollásit kommišuvnna geavahussii, dasgo Norgga almmolaš dearvvašvuođafuolahus ordne psykososiálalaš doarjaga.

Liv Inger Somby oaidná, ahte dán guovtti kommišuvnna bušeahtain lea mealgadis earru. Son goittotge jáhkká, ahte iešguđet kommišuvnnat, maiddái davviriikkaid olggobealde sáhttet doarjut nuppiideaset.

– Dat gávdnojit oalle olu dakkár sullasašvuođat álgoálbmogiid áššiin. Leš dat dearvvašvuohta, leš dat skuvla, leš dál giella ja árbevirolaš eallima doalahit, ja dat gizzu eatnamiid alde, čilge son.

Guldal dás Norgga beale kommišuvnna lahttu Liv Inger Somby jurdagiid duohtavuođa- ja soabadanproseassa birra. Jearahallan lea dahkkon vuossárgga 9.5.2022.

Norgga ja Suoma sámiid duohtavuođa- ja soabadankommišuvnnat leat plánen ovttasbarggu ja dat galggašedje deaivvadit jo dán mánu loahpabealde.

Suoma kommišuvnna dilli lea goittotge dál eahpesihkkar. Komissára Miina Seurujärvi geassádeami dihte earret eará kommišuvnna čállingotti ja Sámedikki mielas dál galggašii váldit smiehtadanbottu. Seurujärvi geassádii kommišuvnnas danin, go vásihii ahte dálá resurssaiguin kommišuvdna ii nákce bargat iežas barggu nu mo galggašii.

Norgga kommišuvnna lahttu Liv Inger Somby ii sáhte Norgga kommišuvnna ovddas kommenteret Suoma kommišuvnna jorggáldagaid.

Beaivvi ságaid ja Yle Ođđasiid Sámis sáhtát maid guldalit Yle Areenas.