Njuike sisdoaluide

Tuâlʼjõž saaʹmi leeuʹdin da Ukraina meermusikk-käpplõõǥǥâst Euroviisuin lie jiânnai seämmanallšemvuõđ

Kautokeinost jälsteei čuäjtõõlli Egil Keskitalo vuâmmšõõvi seämmanallšem melodia saaʹmi vuäʹmm leeuʹd da Ukraina Eurovision laaulǩeâlb käpplõõǥǥ kõõskâst. Tät lij pâi fiin äʹšš, vuäinn Keskitalo.

Egil Keskitalo (vuäʹljsbeäʹlnn) smeâtt, leʹčči-a vueiʹtlvaž, što Ukraina meermusikk da nuõrttsäʹmmlai leuʹddäʹrbbvuõđâst lie seämmanallšem tuâǥǥa. Govva: EBU / CORINNE CUMMING, Beaivváš-teatteri

Tän neäʹttel Europp lij piâssâm naaudšed juõʹǩǩekksaž Eurovision laaulǩeâlbast, koon riâžžât taʹnni Torinost, Italiast.

Jåhtta seärad ǩeâlbb aaʹlji vuõssmõs semifinaalin. Sääʹmest še mäŋggaz siʹrdde televisio peällsa čuâvvad, mõõk riikk pieʹsse ooudårra ǩeâlbast.

Jeäʹrben õõut riikk čuäjtõs leäi Egil Keskitalo pelljapâššneei. Beaivváš-teaʹtter čuäjtõõlli da musikkneǩ Keskitalo vuâmmši, mäʹhtt Ukraina laaulčuäjtõõzzâst õnnum meermusiikk vueʹzz mušttʼte jiânnai tuâlʼjõž nuõrttsäʹmmlai leeuʹd.

– Vuâmmšem, ko puõʹđi Ukraina vuârr, mäʹhtt sij räʹppje di aaʹlji suõmâs čuõjjâd da laullu. Leʹjjem aaibâs snäätnai, što tän leäm kuullâm ouddâl še, mušttal Keskitalo.

Vuâmmšak-a õhttvuõđid musiikki kõõskâst?

Keskitalo vuâmmši, mäʹhtt Ukraina meermusiikk vueʹzz lie mâʹte sääʹmneezzan Anastasia Gerasimooff tuâlʼjõž leuʹdd, Evvan, Konrad âʹlǧǧ. Suu miõlâst tõt iʹlla hueʹnes äʹšš, peʹce pueʹrr, mäʹhtt Euroopp meermusiikk vuäǯǯa sââʹj jõnn musikk-ǩeâlbast.

–Leäi kuuitâǥ tuõđi fiinâs kuullâd tõn, vuäinn Keskitalo.

Lij-a-son Ukraina Euroviisu käpplõõǥǥâst õnnum leeuʹdnallšem meermusikk? Egil Keskitalo miõlâst lij pueʹrr, mäʹhtt Euroopp meermusiikk vuäǯǯa sââʹj jõnn musikk-ǩeâlbast. Mainstâttmõõžž looppâst kuulak vueʹzz Anastasia Gerasimooff Evvan, Konrad âʹlǧǧ -leeuʹdest.

Ukraina meermusiikkâst da saaʹmi leeuʹdin seämmanallšem tuâǥǥa?

Ukraina eeʹttkõʹstti Kalush Orchestra lij taʹnni Eurovision laaulǩeâlb õhtt miõllsumus jooukin. Kalush Orchestra õhttad käpplõõǥǥâst äʹrbbvuõđlaž ukrainalaž musiikk di rääʹpp.

Kalush Orchestra Stefania-käpplõk lij možât pâjjnam Ukrainast meersažlaulli sâjja. Govva: Corinne Cumming / EBU

Keskitalooʹje Evvan, Konrad âʹlǧǧ -leuʹdd lij leämmaž toobdâs juʹn kuuʹǩǩab ääiʹj, ko Beaivváš-teaʹttrest Taarâst raʹjješ Juoiggas-luõđčuäjtõõllmõõžž. Tõn õhttvuõđâst Anastasia Gerasimooff leuʹdd šõõddi tobddsen da tõʹst raʹjješ versio albuuʹme še.

Keskitalo jiõčč smeâtt, leʹčči-a vueiʹtlvaž, što Nuõrtt-Euroopp jeeʹres riikki vuäʹmm äʹrbbmusiikk lie vuäǯǯam vaikktõõzzid nuʹbb nuuʹbbest, nuʹtt še nuõrttsäʹmmlai leuʹddjemäʹrbbvuõtt.

– Smiõʹttem še, što vuäitči-a tät melodia leeʹd tuâlʼjõž slaavlaž meermusiikk suõmâs, kook lie jiânnai õnnum nuõrttbeäʹlnn Eurooppâst. Jiõm vueiʹn tän negatiivlaž äʹššen ni vooʹps, särnn Keskitalo.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.