Njuike sisdoaluide

Ingá-Máret Gaup-Juuso fárus Liet-lávlungilvvus bearjadaga eahket Dánmárkkus: “Mus lea stuorra illu ja gudni vuolgit ovddastit olles Sámi”

Liet-lávlungilvu leat ordnejuvvon jagi 2002 rájes, ja dál guovtte jagi bottu maŋŋá dat ollašuvvá Tønder-festiválain. Gilvui oassálastet 13 čuojahanjoavkku miehtá Eurohpá.

Sámi Grand Prix 2022 vuoiti Ingá-Máret Gaup-Juuso ovddasta sámiid Tønderis Dánmárkkus Liet-lávlungilvvus 13.5.2022. Govva: NRK

Ingá-Máret Gaup-Juuso ovddasta sámiid odne bearjadateahket Tønder-festiválain Dánmárkkus Liet-lávlungilvvus. Son vuittii beassážiid áigge Sámi Grand Prix -gilvvus lávlunoasi, ja árbevirolaččat Sámi Grand Prix vuoiti ovddasta sámiid.

Riikkaidgaskasaš unnitlogugielaid Liet-lávlungilvvut leat ordnejuvvon jagi 2002 rájes. Gilvui oassálastet 13 čuojahanjoavkku miehtá Eurohpá.

– Dat lea dego unnitlogugielaid iežas Eurovision- dáhpáhus, muitala Gaup-Juuso.

Gárasavvonlaš Gaup-Juuso illuda, go beassá ovddastit sámiid Dánmárkui. Son vuordá, ahte deaivvada seammás eará artisttaiguin ja musihkkajoavkkuiguin.

– Mus lea stuorra illu ja gudni vuolgit ovddastit olles Sámi. Ja mun dieđusge geahččalan mu buoremusa dahkat dan eahkeda.

Sámi artisttat leat birgen bures Liet-lávlungilvvus. Vuoittuid leat dohppen (siirryt toiseen palveluun) Transjoik jagis 2003, Niko Valkeapää jagis 2004, Johan Kitti ja Ellen Sara Bæhr jagis 2005, Somby-joavku jagis 2009 ja Ella Marie Hætta Isaksen jagis 2017.

Guldal Ingá-Máret Gaup-Juuso jurdagiid ovdal Liet-lávlungilvvu. Doaimmaheaddjin Anneli Lappalainen.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat