Njuike sisdoaluide

Rivdulist uárnejuvvoo lávurduv vuosmuš Anarâš pááru -tábáhtus

Anarâšah-servi uárnee puoh anarâššáid ávus tábáhtus Rivdulist taan oho lávurduv. Ohjelmist lii siärvástâllâm, tulâstâllâm já olgon orroom.

Vuosmuš Anarâš pááru -tábáhtus uárnejuvvoo Anarist Rivdulist, mutâ tuoivân lii orniđ tábáhtusâid miätá Aanaar kieldâ. Govva: Anneli Lappalainen / Yle
Kuldâl maid Anarâšah seervi saavâjođetteijee Anu Avaskari muštâl tábáhtusâst. Toimâtteijen Sáárá Seipiharju.

Anarâšah-servi orniiškuát Anarâš pááru -nommâsâš tábáhtusâid, já vuosmuš tábáhtus uárnejuvvoo taan oho lávurduv Rivdulist.

– Puáttee lávurduv Vasatokkast tijme 12 rääjist álgá já mist láá emedin já išedin tobbeen anarâšah kiäh ääsih Rivdulist, muštâl seervi saavâjođetteijee Anu Avaskari.

Ohjelm lii rijjâ já ulmen lii pieijâđ tääl Pááru-tábáhtusâid joton. Lávurduv piäsá orroođ olgon, tulâstâllâđ, káhvástâllâđ já siärvástâllâđ.

– Puoh ahasiih anarâšah láá tiervâpuáttim. Meid anarâšah perruinis láá tiervâpuáttim, mij lep ráhtádâttâm, ete meid párnááh puátih.

Aalgâst ulmen lâi orniđ tábáhtusâid jo taan ive aalgâst, mutâ koronatile keežild algâttem sirdui vyesimáánun. Avaskari muštâl, ete ulmen ličij orniđ tábáhtusâid miätá Aanaar kieldâ, meid ucceeb kyláin, tego Njellimist já Pärttihist.

Tuoivâ Pááru-tábáhtusâi orniimist poođij seervi jesânijn. Avaskari arvâl, ete ulmuuh láá-uv vuárdám, ete piäsá vuod čokkâniđ já siärvástâllâđ.

– Tábáhtus pištá kidâ eehid räi já sáávnán meid piäsá, jis haalijd, iätá Avaskari.

Kuldâl lase anarâš saavâid tääbbin.