Njuike sisdoaluide

Mátkkošteaddjit eai álo máhte láhttet sámeguovllus – Sámedikki rávvagiiguin oahpahit rivttes vugiid

Dávjá mátkkošteaddjit eai dieđe mo láhttet sámeguovllus ja sámiiguin. Vásttolaš mátkkošteaddji rávvagiin beassá teavsttaid ja govaid bokte oahppat rivttes vugiid.

Kirsi Suomi lea válmmaštallan sámeturismma ehtalaš rávvagiid. Govva: Vesa Toppari / Yle

Suoma Sámediggi lea almmustahttán vásttolaš mátkkošteaddji rávvagiid (siirryt toiseen palveluun)das, mo berrešii láhttet sámeguovllus. Rávvagiin beassá animašuvnna, sátnegirjji, govaid ja teavsttaid bokte oahppat rivttes láhttenvugiid.

Dárbu dakkárii lea vuolgán das, ahte turismmas vigget ain vuovdit dihtolágan gova sápmelaččain, mii heive turismii, dadjá fidnu plánejeaddji Kirsi Suomi.

– Maid báikkálaččat leat buktán ovdan sin jurdagiid ja hástalusaid das, mo sii leat vásihan mátkkošteami.

Suomi muitala, ahte mátkkošteaddjit eai álo dieđe mo láhttet Sámis. Ášši guoská buot mátkkošteapmái, go olmmoš vuolgá olgoriikkaide amas birrasii.

– Stuorra hástalusat leat leamaš, ovdamearkka dihtii dat ahte atnet sápmelačča dego čájáhusgálvun. Mátkkošteaddjit eai álo muitte, ahte gávtti siste lea olmmoš, gii ii vealttakeahttá háliit gártat amas olbmuid somekanálaide.

Suomi muitala, ahte ii leat guhkes áigi, go son oaččui dieđu das, mo hávdádandilálašvuođas mátkkošteaddjit ledje govven gávttehas gussiid. Dávjá sáhka lea dieđu váilumis. Rávvagiiguin vigget váikkuhit dasa, ahte mátkkošteaddji vállješii vásttolaš mátkkošteaddji rolla.

Okta hástalus lea maiddái dat, ahte dávjá eamiálbmogat leat oaidnemeahttumat iežaset guovllus. Suomas dat oidno ovdamearkka dihtii erämaa-doahpaga bokte, mii dárkkuha ássameahttun meahcceguovllu, čilge Suomi.

Fitnodatdoalli oaidná dárbbu rávvagiidda

Anárlaš fitnodatdoalli Kaisu Nikula mielas dákkár rávvagiidda lea čielga dárbu. Mannan geasi son háleštii olu suopmelaš mátkkošteddjiiguin ja imaštalai dan, makkár jurdagat olbmuin leat.

– Sii háliidit álo oaidnit sápmelaččaid ja jerret gos dat leat, gos beassá oaidnit. Mun imaštalan, ahte mo suopmelaččain leat dakkár amas gažaldagat. Dan gal ádden juos olbmot, geat bohtet Eurohpás, eai dovdda nu bures sámekultuvrra.

Kaisu Nikula lea oahpásmuvván rávvagiidda ja áigo maiddái iskat rávvagiid teasttas, man bures son máhttá láhttet sámeguovllus. Govva: Sáárá Seipiharju / Yle

Nikula lea ieš oahpásmuvvan rávvagiidda ja lea duhtavaš dasa, ahte dat lea álkit gávdnan láhkái ja daid lea vejolaš juohkit maid sosiála medias. Nikula sávvá, ahte rávvagiin lea veahkki.

– Mu mielas dat lea hui dehálaš, go mii viggat dáppe ovddidit dakkár bistevašvuođa min suorggis. Mu mielas buot olbmot ja fitnodagat, mat barget mátkkoštansuorggis, galggašedje buktit ášši ovdán ja smiehttat, maid ieš sáhttá bargat.

Rávvagat leat oassin viidásut ollisvuođas. Ulbmilin livčče muhtun muttus dahkat sámemátkkošteami sertifikahta, vai olbmot beasašedje dahkat vásttolaš válljejumiid, muitala Kirsi Suomi.

Rávvagat leat suomagiela lassin maiddái eaŋgalasgillii ja dat vuođđuduvvet Sámedikki jagis 2018 dohkkehan sámemátkkošteami ehtalaš rávvagiidda.

Guldal manin fitnodatdoalli Kaisu Nikula mielas lea dárbu dakkár rávvagiidda. Doaimmaheaddjin Sáárá Seipiharju.

Beaivvi ságaid ja Yle Ođđasiid Sámis sáhtát maid guldalit Yle Areenas.