Njuike sisdoaluide

Guldal jiena: Olles Norga ávvuda otne – maiddái Suomas Norgii fárren sámit leat oahppan ávvudit Norgga álbmotbeaivvi

Elle Maaret Labba Romssas ja Marko Länsman Lillehammeris leaba oahppan ávvudit norgalaččaid láhkai daid jagiid áigge, maid leaba Norggas orron.

Elle Maaret Labba hálida čiŋadit gávttiin Norgga álbmotbeaivve. Govva: Elle Maaret Labba

Maŋŋebárgga miessemánu 17. beaivve olles Norga ávvuda leavggaiguin, ráidovázzimiiguin ja čikŋabiktasiiguin. Otne ávvudit Norgga álbmotbeaivvi ja maiddái sápmelaččat, geat ásset Norggas, leat oahppan ávvudit norgalaččaiguin.

Elle Maaret Labba lea eret Eanodaga guovllus ja lea ássan jagi 2010 rájes Norgga bealde. Álggos son ii orron máhttimin ávvudit Norgga álbmotbeaivvi, son fertii váldit čielgasa manin norgalaččat ávvudit miessemánu 17. beaivve.

– Mun lean dieđus hárjánan Suoma iehčanasvuođabeaivvi ávvudit, muhto dáid maŋimuš jagiid lean ávvudan. Mun lean guovtte háve leamaš oaivegávpogis Oslos maid ja doppe gal boahtá dat albma dovdu, muitala Labba.

Guldal Elle Maaret Labba olles jearahallama dás. Jearahallin lea Susanna Guttorm.

Marko Länsman fas lea eret Ohcejoga guovllus ja lea orron jagi 2004 rájes Norgga bealde. Álgojagiid son lávii ávvudit miessemánu 17. beaivve ovttas ustibiiguin, muhto dán áigge son ávvuda dan iežas bearrašiin ovttas.

– Iđđes vuos borrat ovttas iđitbihtá, dan maŋŋá mii fitnat gávpogis čuovvumin ráidovázzimiid. Beaivit čoahkkanat ustiibiiguin herskostallat njálgga borramušain, muitala Länsman.

Guldal Marko Länsman olles jearahallama suomagillii dás. Jearahallin lea Susanna Guttorm.

Labba ja Länsman láveba guktot čiŋadit gávttiin, eabage leat vásihan negatiivalaš kommeanttaid. Norgalaččat leat hui ustitlaš olbmot ja liikojit oaidnit gávttehasaid.

– Dathan gal lea čielggas, ahte sápmelaš coggá gávtti nala, dadjá Labba.

Marko Länsman ja su nieiddaš leaba čiŋadan gávttiin Norgga álbmotbeaivve. Govva: Marko Länsmanin oma albumi / priváhtagovva

– Mus ja munno nieiddas lea gákti ja moarsis fas lea Norgga álbmotbivttas, bunad, badjelis. Norgalaččaide lea hui dehálaš čiŋadit albmaláhkai álbmotbeaivvi gudnin, muitala fas Länsman.

Norggas miessemánu 17. beaivve lea almmolaš friijabeaivi ja levgenbeaivi. Dan ávvudit Norgga vuođđolága gudnin, mii nannejuvvui jagis 1814.

Ná manná álbmotbeaivvi ráidu Čáhcesullos 17.5.2022.

Beaivvi ságaid ja Yle Ođđasiid Sámis sáhtát maid guldalit Yle Areenas.

Divvojuvvon 17.5. dii. 16.32: Länsman hállá ovtta nieiddaža birra iige guovtte, dego áššis vuos muitaluvvui.