Njuike sisdoaluide

Guldal jiena: Kárášjoga gieldda njunuš evttoha luossabivdogildosa Detnui vel čuovvovaš viđa jahkái

Kárášjoga sátnejođiheaddji Svein Atle Somby oaivvilda, ahte jus luossa nohká Deanus, de seammás nohká maid johkasámikultuvra.

Kárášjoga sátnejođiheaddji Svein Atle Somby dadjá NRK Sápmái, ahte guovtti jagi luossabivdogielddus ii leat doarvái gádjun dihte Deanu luosa. Govva: Kjell H. Sæther

Luossabivdit šaddet juo nuppi maŋŋálaš geasi čuččodit lupmalaš gieđaiguin Deatno gáttis, go sihke Norga ja Suopma áigot joatkit luossabivdogildosa Deanu čázadagas.

Norgga dálkkádat- ja birasministeriija lea juo mearridan áššis boahttevaš geasi oasil. Suoma bealde ášši vuordá vel riikabeivviid maŋimus steampala, muhto jáhkkimis stáhtaráđi evttohus bivdogildosis ii šat doppe rievdda.

Luossabivdogildosa ákkastallet Deanu luossanáli gáhttemiin ja ealáskahttimiin. Sámiid gaskkas gielddus lea ságastahttán garrasit ja oaivilat leat sihke vuostá ja bealis.

Kárášjoga sátnejođiheaddji Svein Atle Somby dadjá NRK Sápmái (siirryt toiseen palveluun), ahte guovtti jagi luossabivdogielddus ii leat goit vel doarvái gádjun dihte Deanu luosa.

– Mu árvalus lea dál várjalit luossanáli ja ahte mii fertet dál giddet dán bivddu hui guhkes áigái ovddos guvlui. Mii leat diibmá gidden ja dán jagi gidden. Dál lea vel vihtta jagi doalahit gitta, nu ahte midjiide maid boahtá deike luossa bajit čázadahkii, dadjá Somby.

Sámeorganisašuvnnat sihke Suomas ja Norggas leat gáibidan, ahte sámiin galgá leat riekti ráddjejuvvon luossabivdui, amas bivdokultuvra oalát jávkat. Somby goit oaivvilda, ahte jus luossa nohká, de nohká maid johkasámikultuvra.

– Dat maid mii oaidnit dáppe badjin lea dat, ahte go luossa nohká, de nohká maid dat árbevierru. Mis eai leat šat bivdosat jogas eaige mis leat buođut. Mis lea juo nohkamin dat, árbevirolaš bivdu manná guoli mielde, dadjá Somby.

Kárášjoga sátnejođiheaddji mielas guollebivdui gal vel beassá, vaikko luosa ii oaččošiige bivdit.

– Mis leat olu guolit ja buorit jávrrit maiddái. Leat hárrit ja hávggat. Mis leat ain guolit maid mii sáhttit bivdit ja maid mii berret bivdit, dadjá Svein Atle Somby.

Kárášjoga sátnejođiheaddji Svein Atle Somby dadjá, ahte jus luossa nohká Deanus, de seammás nohká maid johkasámikultuvra. Jearahallan gullui Buorre Iđit Sápmi -sáddagis 18.5.2022. Doaimmaheaddjin lea Piera Balto NRK Sámis.

Beaivvi ságaid ja Yle Ođđasiid Sámis sáhtát maid guldalit Yle Areenas.