Njuike sisdoaluide

Guldal jiena: Giđa studeanta Ibbá Lauhamaa vuolgá soahtevehkii logahaga maŋŋá – soahtebálvalus geasuha ain eanet nissoniid

Eanodatlaš Ibbá Lauhamaa háliida oaidnit, makkár lea soahteveagas. Danin son sáddiige ohcamuša nissoniid eaktodáhtolaš soahtebálvalussii ja álggaha soahteveagas ođđajagimánus 2023.

Ibbá Lauhamaa váccii logaha Eanodaga duottarlogahagas. Govva: Ibbá Lauhamaa
Eanodatlaš Ibbá Lauhamaa lea duhtavaš studeantačállosiid bohtosiidda, mat bohte 17. beaivve miessemánu. Doaimmaheaddjin Anja Kaarret.

Ođđa gákti, liidni ja gápmagat leat skáhpes vuordimen geassemánu 4. beaivve. Dalle dán giđa studeantta, eanodatlaš Ibbá Lauhamaa coggá vilgesgahpira oaivái.

Máilbmi rahpasa logahaga maŋŋá ja Lauhamaas leatge boahttevuođa ektui máŋggalágan plánat ja molssaeavttut.

– Mun lean buotlágan molssaeavttuid geahččalan čoaggit alccen ja dušše vuordán dan beaivve go dan mearrádusa ferte bargat. Studeret mun lean vuolgimen, in dieđe vel goas, muhto gosa nu ja goas nu, son čaibmá.

Ovdal studerema sus lea ovddabealde goittotge okta earenoamáš dáhpáhus. Son vuolgá ođđajagimánus 2023 soahtevehkii.

– Mun lean juo badjedásis smiehttan, ahte livčče áibba somá vuolgit. Dieđusge dásseárvvu namas goit, muhto muđuige beasašii oaidnit makkár dat lea.

Lauhamaa lohká, ahte dál go lea boarásmuvvan, son ádde buorebut, maid militeara vázzin gáibida. Soahtedilli Ukrainas ii váikkuhan su mearrádussii moge, son sáddii ohcamuša nissoniid eaktodáhtolaš bálvalussii jo ovdal soađi.

Soahtevehkii ohcaledje diibmá eanet nissonat go ovdal

Nissoniid eaktodáhtolaš soahtebálvalus geasuha olu nissoniid, ja diibmá soahtevehkii ohcaledje olahus olu nissonat.

Maŋimus áiggiid Suomas leat čielggadan vearjogeatnegasvuođa ođasmahttima. Moatte jagi geažes soitet sihke nuorra nissonat ja albmát oažžut reivve Suoma bealuštanfámuin.

Bákkolaš gohččumat eai goit dárkkuhivčče bákkolaš vearjogeatnegasvuođa nissoniidda. Ulbmil livčče baicce juohkit dieđu eaktodáhtolaš soahtebálvalusas, vai ain eambbosat sáhtášedje mearridit vuolgit soahtevehkii.

Yle gažadeami mielde eanáš oassi Suoma riikabeaiáirasiin oaivvilda, ahte nissoniidda ii galggašii leat bákkolaš vearjogeatnegasvuohta.

Beaivvi ságaid ja Yle Ođđasiid Sámis sáhtát maid guldalit Yle Areenas.