Njuike sisdoaluide

Lappi kulturfoanda juolluda sámekultuvrii badjel 50 000 euro – veahkkeruđain šaddet dánsunfilbma ja ođđa musihkka

Musihkkár Aimo Aikio, dánsu Laura Feodoroff, musihkkár Nicholas Francett ja dáiddár Tuuli Manninen ožžot veahkkeruđa sámekultuvrii laktáseaddji dáiddalaš bargguide.

Anárlaš musihkkár Aimo Aikioi mieđihuvvo 13 000 euro veahkkeruhta livđe ja leu’dd gieđahalli komponerenbargui. Govva: Mari Gauriloff

Suoma kulturruhtaráju Lappi foanda lea juohkán oktiibuot 570 000 euro ovddas veahkkeruđaid 41 ohccái. Sámekultuvrii juolluduvvui 56 000 euro.

Musihkkár Aimo Aikio oažžu 13 000 euro veahkkeruđa livđe ja leu’dd gieđahalli komponerenbargui.

Dánsundáidaga magisttar Laura Feodoroff bargojoavkkuinis oažžu 17 000 euro nuortalaš katrilladánsunfilmma ráhkadeapmái.

Musihkkár Nicholas Francettii mieđihuvvo 13 000 euro vuosttaš albuma ráhkadeapmái, man temán leat Sámi gávcci jagiáiggi.

Dáidaga magisttar Tuuli Manninen oažžu maid 13 000 euro veahkkeruđa Kollʼješkueʹtted -jietnainstallašuvnna ollašuhttimii ja čájáhusaid ordnemii sámemuseain.

Dasa lassin riektediehtagiid magisttar Sarita Kämäräinen oažžu 3 000 euro anárašgiela oahpuid várás.

Boazodoalu ja unnitlogugielaid gieđahallet árktalaš dutkamušas

Maiddái árktalaš guovlluid dutkamii mieđihuvvojedje veahkkeruđat.

Filosofiija magisttar Eero Johannes Myrsky oažžu 26 000 veahkkeruđa nákkosgirjebargui, mii gieđahallá árktalaš ekosystema rievdama historjjálaš bohccuid rátkinguovlluin.

Luonddudiehtagiid magisttar Jonne Säleväi mieđihuvvo 13 000 euro nákkosgirjebargui, mii gieđahallá modearna giellateknologalaš applikašuvnnaid ovddideami árktalaš guovllu unnitlogugielaide.

Servodatdiehtagiid magisttar Birgitta Vinkka oažžu 13 000 euro nákkosgirjebargui, mii gieđahallá dan, mo dálkkádatrievdama áigge árktalaš gávpogiin meannudit muohttagiin ja mo muohta váikkuha servodateallimii.

Listu buot veahkkeruđaid oažžuin gávdno Suoma kulturruhtaráju neahttasiidduin. Dáidaga oassi veahkkeruđain lea 58 proseantta, ja diehtaga oassi sturrui dán jagi 42 prosentii.

Lappi kulturfoandda jahkeávvudoalut lágiduvvojedje otne lávvardaga Roavvenjárggas.

Beaivvi ságaid ja Yle Ođđasiid Sámis sáhtát maid guldalit Yle Areenas.