Njuike sisdoaluide

Greta Thunberg oaččui suopmelaš fitnodagas 30 000 euro bálkkašumi – ruđat skeŋkejuvvojit Suoma sámenuoraid dálkkádatbargui

Niemi Palvelut Oy mieđiha dál nuppi háve Maailmanmuuttaja-bálkkašumi olbmui, guhte lea nuppástuhttán máilmmi. Dálkkádatbarggustis bálkkašuvvon Greta Thunberg hálidii skeŋket bálkkašumis ruđaid Suoma sámenuoraide.

Sámenuorat ledje mojunjálmmiid, go sii ožžo bálkkašumi. Govas gurot rávddas Máren-Elle Länsman, Enni Similä, Anne Olli, Petra Laiti ja Teija Kaartokallio. Govva: Kirsti Länsman / Yle

Suoma Sámi Nuorat -searvi oaččui lávvardaga 30 jagi ávvudoaluidasaset vuorddekeahtes skeaŋkka. Ruoŧŧelaš dálkkádataktivista Greta Thunberg skeŋke Maailmanmuuttaja-bálkkašumis Suoma Sámi Nuorat -searvái.

Thunberg oaččui Maailmanmuuttaja-bálkkašumi barggustis dálkkádatnuppástusa dustema ovdii. Bálkkašupmi lea 30 000 euro ja dan mieđiha suopmelaš fitnodat Niemi Palvelut Oy.

Thunberg mearridii skeŋket bálkkašumi Suoma Sámi Nuorat -searvvi doaimmaide searvvi buori dálkkádatbargguid geažil. Searvvi lahtut besse gullat bálkkašumi oažžumis otne lávvardaga searvvi 30 jagi ávvudoaluid oktavuođas Anáris. Thunberg celkkii dearvvuođaid sámenuoraide video hámis.

– Munnje lea stuorra gudni oažžut Maailmanmuuttaja-bálkkašumi. Lean ilus das ahte bálkkašumi ruđat mannet Suoma Sámi Nuorat -searvvi doaimmaid doarjumii, Thunberg muitala Anárii sáddejuvvon videodearvvaheamis.

Greta Thunberg.
Greta Thunberg hálida bidjat návccaid eamiálbmogiidda, geat miehtá máilmmi deaividit dálkkádatnuppástusa váikkuhusaiguin. Geahča dás Thunberg videodearvvuođaid sámenuoraide. Video: Greta Thunberg. Govva: Carl-Johan Utsi / EPA.

Thundberg deattuha giittosságastis eamiálbmogiid mearkkašumi sihke dálkkádatnuppástusa gillájeaddjin ja vuostálastin.

– Eamiálbmogat miehtá máilmmi gártet ovddemužžan deaividit dálkkádatnuppástusa váikkuhusaiguin, ja sii maiddái barget dan eastadeami ovdii. Danin návccaid bidjan sin bargui ja árbedihtui lea seamma go dálkkádaga suodjaleapmi, Thunberg fuomášuhttá.

Fitnodatjođiheaddji: "Stuorra gudni ahte Greta mieđai váldit bálkkašumi vuostá"

Guldal Juha Niemi jearahallama dás.

Niemi Palvelut Oy lea suopmelaš bearašfitnodat, mii fállá fárrehan- ja logistihkkabálvalusaid. Fitnodat mieđiha dál nuppi háve Maailmanmuuttaja-bálkkašumi olbmui, guhte lea nuppástuhttán máilmmi.

Niemi Palvelut Oy bálkkašumi oaččui vuosttas háve Martti Ahtisaari logi jagi dassái ráfibarggustis.

Niemi Palvelut Oy fitnodatjođiheaddji Juha Niemi muitala ahte bálkkašumi addin Greta Thunbergii lei áibbas čielggas, go sii hálidit doarjut dálkkádatbarggu. Bálkkašumi ruđaid čujuheapmi sámenuoraide manai Niemi miela mielde. Niemi fuomášuhttá ahte lea stuorra gudni go Thunberg mieđai váldit bálkkašumi vuostá.

– Mii leat fárrehanfitnodat ja fárrehit juohke jagi olbmuid ja fitnodagaid miehtá Suoma ja máilmmi. Logi jagi dassái bohciidii jurdda ahte ozašeimmet olbmo, guhte lea nuppástuhttán máilmmi, Niemi čilge bálkkašumi duogáža.

Petra Laiti: "Dálkkádat lea midjiide seamma go boahttevuohta"

Ruhtadoarjja lea sámenuoraide buorre liiba.

– Dálkkádat lea midjiide seamma go boahttevuohta. Hálidan deattuhit dan, man dehálaš lea ahte sámit dovddastuvvojit ja besset ain eanet oassálastit dálkkádatságastallamii, muitala Suoma Sámi Nuorat searvvi ságadoalli Petra Laiti preassadieđáhusas.

Suoma Sámi Nuorat -searvvi ságadoalli Petra Laiti lei duđavaš searvvi 30 jagi ávvudoaluin Anáris. Govva: Jarmo Siivikko / Yle

Lea mearkkašahtti ahte Thunberg vuostáiválddii bálkkašumi Niemi Palvelut Oy:s dainnago son lea máŋgii maiddái biehttalan váldimis bálkkašumiid fitnodagain. Sivvan dasa leat leamašan fitnodagaid boasttolágan árvvut dahjege doaimmat dálkkádatnuppástusa ektui.

Beaivvi ságaid ja Yle Ođđasiid Sámis sáhtát maid guldalit Yle Areenas.