Njuike sisdoaluide

Davviriikalaš sámesoahpamuš lea ain áigeguovdil, oaivvildeaba Tuomas Aslak Juuso ja Silje Karine Muotka

Suoma ja Norgga sámedikkiid njunnošat eai leat vel vuollánan sámesoahpamuša ektui, vaikko bargu leage bistán jo guoktelot jagi.

Sámekulturguovddáš Sajosis lei duorastaga sámeparlamenttarihkkariid konferánsa, gos Norgga sámedikki presideanta Silje Karine Muotka, Suoma sámedikki ságadoalli Tuomas Aslak Juuso ja Ruoŧa sámedikki stivraságadoalli Håkan Jonsson jođihedje konferánssa. Govva: Kirsti Länsman / Yle

Suoma ja Norgga sámedikkiid njunnošiin lea ain jáhkku davviriikalaš sámesoahpamuššii. Soahpamuša leat gárven jo guoktelot jagi. Maŋimuš jagis 2017 almmustuvai evttohus, mas polihkkariin ledje guovttilágan oaivilat.

Bargu lea ain jođus, muhto vuos ii leat diehtu man johtilit sámesoahpamuš dán háveges ovdána.

– Mii fertet oaidnit ja gullat, ahte guđe ládje iešguđet proseassaoasit ovdánit. Mii leat dál buriin vuoiŋŋain ságastallan iešguđet oassebeliid gaskan das, ahte makkár čovdosiin sáhtášeimmet ovdánit. Eat leat vel boahtán bohtosii goitge, muitala Suoma sámedikki ságadoalli Tuomas Aslak Juuso.

Maiddái Norgga sámedikki presideanta Silje Karine Muotka jáhkká, ahte sámesoahpamuša sisdoalus besset buot oassebealit vel ovttamielalašvuhtii, vaikko ii duosttage vel árvalit makkár áigetávvaliin.

– Dat gáibida ja eaktuda ahte golbma stáhta ja golbma sámedikki galget dohkkehit sisdoalu ja konvenšuvdna galgá oppalaččat doaibmat dan láhkai ahte nannet min vuoigatvuođaid, ii unnidit min vuoigatvuođaid.

Muotka ja Juuso mielas sámesoahpamuš lea ain áigeguovdil, vaikko bargu leage bistán guhká.

– Sámesoahpamušhan leamaš ulbmilin jo máŋgalot jagi, ahte iihan dás gánnát heađastuvvat. Mii bargat áššiin ja ulbmilin lea oažžut davviriikalaš sámesoahpamuša, mii doallá dási vuoigatvuođalaččat maiddái eará riektegálduid ektui, oaivvilda Juuso.

Davviriikalaš sámesoahpamuš lei ovdan oktan áššin duorastaga 19.5.2022 sámeparlamenttarihkkariid konferánssas Anáris.

Sámesoahpamuša ulbmilin lea earret eará dorvvastit sámekultuvrra doaibmanvejolašvuođaid ja dahkat sápmelaččaid guoski soahpamušaid davviriikkain seammaláganin. Suoma, Norgga ja Ruoŧa oktasaš sámesoahpamušain lea ulbmil nannet sámiid vuoigatvuođaid nu, ahte sámiin lea vejolašvuohta ovddidit giela, kultuvrra, ealáhusaid ja servodaga seammaláhkai riikkarájáin fuolakeahttá.

Beaivvi ságaid ja Yle Ođđasiid Sámis sáhtát maid guldalit Yle Areenas.