Njuike sisdoaluide

Kuvddâl jiõn: Laura Feodorooff kaʹdrelfiʹlmme Lappi foond veäʹǩǩteäʹǧǧ – õhttsa 56 000 eeuʹr sääʹmkulttuuʹre

Lääʹddjânnam kulttuurfoond Lappi fondd juõʹjji taʹnni 570 000 eeuʹr mäddkååʹdd kulttuuʹre. Laura Feodoroff lij õhtt veäʹǩǩtieʹǧǧ vuäǯǯjin.

Laura Feodoroff lij sami rämmai Lappi foond veäʹǩǩtieʹǧǧest. Govva: Jenni Kollani

Tanssčeäppõõzz maister Laura Feodoroff tuâjj-jooukines vuäǯǯai Lappi foondâst 17 000 eeuʹr veäʹǩǩtieʹǧǧ kaʹdrelfiiʹlm tuejjummša. Fiʹlmmprojeʹktt aaʹlji juʹn muäʹdd eeʹjj mââiårra.

– Meeʹst lie leämmaž vaiggâdvuõđ, leâša ååʹn lij fiin vueʹǩǩ da piâssâp mââimõõzzâst altteed fiiʹlm puuʹtʼtõõzz, rämmaš Feodoroff.

Sääʹmkulttuur tueʹrjjee taʹnni õhttsa 56 000 eeuʹrin. Jeäʹrbi mieʹldd Aimo Aikio vuäǯǯai 13 000 eeuʹr leeuʹdi di livđei suõmmummša da Tuuli Manninen vuäǯǯai 13 000 eeuʹr Kollʼješkueʹtted -nõmmsaž jiõnninstallaatio tuejjummša di čeäppõsčuäjtõõzzi jäʹrjstummša sääʹm-muʹzeeʹjid.

Laura Feodoroff maainast kaʹdrelfiiʹlmes pirr.

Fiiʹlm maainâs vuâđđââvv vuäzzas Feodorooff jiijjâs jieʹllma

Laura Feodoroff lij šõddâm Oulu gåårdest da jäälast ååʹn Heʹlssnest. Son lij reâuggam taʹnssjeeʹjen, tanssuʹčteeʹlen da koreograafân eeʹjj 2008 rääʹjest. Fiiʹlm maainâs mušttal Feodorooff jieʹllmest vuäzzas.

– Tõt ǩiõttʼtââll identiteeʹtt, pååđvuõđ ǩiõččlâsttmõõžžid da sääʹm alggveär, kook lie siõmmna verraz muʹnne, ku jiõm leäkku šõddâm sokkvuuʹdstan.

Feodoroff da Kati Kallio lie fiiʹlm oʹhjjeei, ǩiõttǩeeʹrjteei da koreograaf. Fiiʹlm puuʹtat Mete Sasioglu Sons of Lumière -puuʹtʼtemõutstõõzzâst. Feodoroff čuäjtââll še fiiʹlm vueiʹvvpersoon.

– Son vuâlgg Čeʹvetjäurra, koʹst käunnʼje ođđ ǩiõččâmvueʹjj ǩiõttʼtõõllâd tobddmõõžžid da viõkksõõvvmõõžž taans pääiʹǩ.

Kaʹdrel lij vääžnai Feodorooff piârrǥa. Suu äkk siõri kaʹdreeʹl täujja da äʹjj siõri suõm garmaanin.

– Mij leäʹp ǩiččlõõttâm jäʹrjsted kaʹdrelkuurs määŋg vuâra, leâša tõt ij leäkku võl šõddâm pandemia diõtt. Kuurs kuuitâǥ jäʹrjstet ouʹddelgo fiiʹlm fiʹlmmjem älgg.

Fiiʹlm fiʹlmmjet Čeʹvetjääuʹr vuuʹdest. Feodoroff da Kallio lie leämmaž toʹben mueʹdd vuâra da âânnam tuâjjpõõrtid pääiklaž oummuid.

– Muännast lie leämmaž šiõǥǥ saǥstõõllmõõžž čeʹvetjäuʹrrniiʹǩǩivuiʹm. Haaʹlääm späʹssbõõššâd puk tõid oummuid, kook lie leämmaž mieʹldd. Muännaid vaʹlddeš vuâstta tuõđi pakksânji, mušttal Feodoroff.

Ođđasamosat