Njuike sisdoaluide

Ohcejogas rahpe giellaguovddáža – "Stuorra ja dehálaš ášši Ohcejoga gildii", dadjá Laura Arola

Giellaguovddáža rahpan leamašan guovtte jagi prošeavtta deháleamos ulbmil, ja viimmat leat joavdan dan rádjai, ahte sáhtte doallat rahpandoaluid.

Yleisö istuu tuoleilla Utsjoen monitoimitilassa kielikeskus Giellagárdin avajaisissa.
Yle Sápmi sáddii njuolggosáddaga Ohcejoga giellaguovddáža rahpandoaluin.

Ohcejogas rahpe otne vuossárgga Giellagárdi-nammasaš giellaguovddáža. Norggas giellaguovddášdoaibma leamaš jo guhká, muhto dát lea vuosttas giellaguovddáš, mii álggaha doaimmas Suoma beale Sámis.

Máŋggagielatáššedovdi Laura Arola Deanuleagis sámástit -prošeavttas dadjá, ahte dát lea illubeaivi sidjiide.

– Mis leamašan guokte jagi stuorra Interreg-prošeakta. Mis leamašan deháleamos ulbmilin justa rahpat deike albma, bissovaš giellaguovddáža ja min fidnus leamašan Norgga bealde maid oasseváldit.

Máŋggagielatvuođaáššedovdi Laura Arola dadjá, ahte dát lea illubeaivi sidjiide. Govva: Kirsti Länsman / Yle

Arola joatká, ahte sii leat beassan oahpásmuvvat Norgga beale giellaguovddášdoaimmaide ja dál siige leat viimmat joavdan dán rádjái, ahte leat rahpandoalut.

– Lea dieđusge hui stuorra ja dehálaš ášši Ohcejoga gildii, muhto mun jáhkán ahte maiddái Suoma sámi servodahkii.

Ohcejoga gielda mearridii jagi 2022 bušeahttagieđahállamis vuođđudit giellaguovddaža. Giellaguovddaža nammagilvvu vuittii namma Giellagárdi. Giellaguovddáš lea sámegiela ealáskahttima guovddaš, mii lágida sámegillii giellaarenaid, ovddida gielabirrasa ja nanne gielalaš vuoigatvuođaid.

Giellaguovddáš lea Ohcejoga boares skuvllavisttis, Áilegas-dálus. Govva: Kirsti Länsman / Yle

Yle Sápmi sáddii njuolggosáddaga rahpandoaluid álggus Yle Areenas. Ohcejoga gielda sáddii maid iežas njuolggosáddaga rahpandoaluin, man sáhtii čuovvut Teams bokte (siirryt toiseen palveluun).

Rahpandoaluid prográmmas muitaledje Giellagárddi plánaid ja Ohcejoga gielladili birra, sámegiela ealáskahttimis rávesolmmožin ja gulle Laura Tapiola juoigamin Máttuid árdna -luđiid.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat