Njuike sisdoaluide

Suoma Sámi nuorat illudit Greta Thunberga skeŋkejumis: "Das boahtá dakkár dovdu, ahte olbmot čužžot maiddái min duohkin", dadjá Petra Laiti

Searvvi ságadoalli Petra Laiti atná ruhtaskeŋkejumi hui dehálažžan searvái. Stivrra várrelahttu Maren Elle Magga masá njuikii čuoččat ja biškkui ilus, go gulai Thunberga skeŋkejumis.

Suomen saamelaisnuorten yhdistyksen jäsenet ryhmäkuvassa saamelaiskulttuurikeskus Sajoksen kierreportailla.
Suoma Sámi Nuorat lágidedje lávvardaga searvvi 30 jagi ávvuseminára sámekulturguovddáš Sajosis Anáris. Oasseváldit guldaledje mojunjálmmiin Greta Thunberga videodearvvaheami.

Suoma Sámi Nuorat -searvvi doaibma oažžu ođđa fártta, go searvi fidnii vuorddekeahttes ruhtaskeaŋkka ruoŧŧelaš dálkkádataktivista Greta Thunbergis. Thunbergii lei mieđihuvvon suopmelaš fitnodaga Maailmanmuuttaja-bálkkašupmi, man árvu lea 30 000 euro. Thunberg háliidii addit ruđa Suoma Sámi nuoraid barggu doarjumii.

Searvvi ságadoalli Petra Laiti atná dán ruhtaskeŋkejumi hui dehálažžan searvái. Son jáhkká, ahte ruhta lea ávkin sihke searvvi ja maiddái buot sámenuoraid boahttevuhtii.

– Min sturrosaš searvái mearkkaša olu, ahte min ekonomalaš dilli obalohkáige lea stáđis, muhto dákkár ruhtamearri addá searvái vejolašvuođa albmaláhkai smiehttat, maid mii háliidat čuovvovažžan bargat, muitala Laiti.

Dálkkádaga rievdan lea stuorra ášši nuoraide

Searvvi ovddeš ja dálá lahtut besse gullat ođđasa searvvi 30 jagi ávvudoaluid oktavuođas lávvardaga Anáris, go Thunberg searvvai čoahkkimii videodearvvahusa hámis.

Geahča Greta Thunberg videodearvvaheami dás.

Petra Laiti diđii áššis jo ovddalgihtii, ja son vurddiige gealdagasas ahte earát besset gullat dan birra.

Suoma Sámi Nuorat -searvvi stivrra várrelahttu Maren Elle Magga masá njuikii čuoččat ja biškkui ilus, go gulai Thunberga skeŋkejumis. Dálkkádatáššit leat sutnje dehálaččat eandalitge danin, go lea mielde boazodoalus ja oaidná dálkkádaga rievdama olles áigge.

– Mun sávan, ahte beasan ieš goit váikkuhit searvvi bokte juste dieidda áššiide, lohká Magga.

Dálá ja ovddeš SSN lahtut Anne Olli, Máren-Elle Länsman, Petra Laiti, Enni Similä, Tuomas Aslak Juuso, Maren Elle Magga ja Marielle Näkkäläjärvi čoahkkanedje joavkogovvii ovttas eará oasseváldiiduin searvvi 30 jagi ávvudoaluin. Govva: Kirsti Länsman / Yle

Petra Laiti oaidná, ahte Thunberga skeŋken čájeha, man dehálaš lea diehtit, ahte ii leat okto ná stuorra áššiin. Dehálaš lea maid dat, go nu dovddus olmmoš gidde fuomášumi sápmelaččaid ja eará eamiálbmogiid rahčamušaide, oaivvilda Laiti.

– Dat lea dange dihtii nu mearkkašahtti, ahte nuge dovddus ja bivnnuhis olmmoš go Greta Thunberg vuosttažettiin diehtá geat mii leat, muhto maiddái maid mii bargat ja háliidii midjiide dan skeaŋkka addit. Das boahtá dakkár dovdu, ahte olbmot čužžot maiddái min duohkin.

Beaivvi ságaid ja Yle Ođđasiid Sámis sáhtát maid guldalit Yle Areenas.