Luondduriggodatguovddáš LUKE dutká ruoššaluosa diimmá gođu veajehiid Deanu njálmmis Norgga bealde. Veajehat leat eallán dálvvi jogas ja vudjet dál merrii borrat ja stuorrut.
Luke dutki Mikko Kytökorpi muitala, ahte ruoššaluosa veajehat leat dál sullii njealji sentte mahtásaččat, muhto sturrot mearas issoras fárttain.
– Dál dat borret čuovvovaš jagi doppe mearas ja boahtte jagi dat galggašedje fas boahtit ruovttoluotta. Ráves ruoššaluossa deaddá 1–3 kilográmma, go fas goargŋu johkii, muitala Kytökorpi.
Luke dutkit leat bivdán ruoššaluosa veajehiid nuhtiin gáddečázis ja vihkken ja mihtidan daid. Ulbmilin lea oažžut eambbo dieđuid das, ahte mo ruoššaluosat láhttejit ja lihkadit. Deanu luosa ektui ruoššaluosat leat earáláganat.
– Atlántta luossa sáhttá eallit jogas juobe vihtta jagi, ovdal go dat vuodjá merrii. Ruoššaluossa fas vuodjala merrii veajehin, muitala Kytökorpi.
Ruoššaluosat gorgŋo Detnui mannan geasi olahus olu. Dutkiid mielde Eurohpá stuorámus luossajogas ledje geasi loahpas mealgat eanet ruoššaluosat go Atlántaluosat dahje Deanu eamiluosat.
"Jávkadeapmi sáhttá leat hástealeaddji"
Ruoššaluossa lea álggoálggus Jaskesábi davviosiid šládja, mii sirdimiid geažil lea goargŋugoahtán dál fárttain Jiekŋameara luossajogaide.
Ruoššaluossa eallá fal guokte jagi, dat guohcaga ja jápmá johkii gođu maŋŋel. Dattetge dan ballet rivvet gođđusajiid dábálaš luosas. Sihke Norga ja Suopma leatge bidjame olu návccaid ruoššaluosa eastadanbargui.
Dutki ii jáhke, ahte ruoššaluosa sáhtášii oalát jávkadit davimus luossajogain.
– Gal leavvama sáhttá muhtin muddui ráddjet, muhto dan jávkadeapmi sáhttá leat oalle hástaleaddji. Hástalus lea dat, ahte ráves ruoššaluosat eai soaitte dádjadit goargŋut ruovttujohkii, muhto vudjetge nuppi johkii ja dienu dat dasto levvet ođđa guovlluide, čilge Kytökorpi.
Dán geasi ruoššaluosaid eai vuordde goargŋut Detnui nu stuorra meriid go diibmá, go ruoššaluossa goargŋu báruid mielde bárahis jagiid. Boahttevaš stuorra ruoššaluossabárru lea vuordimis jagis 2023.
Beaivvi ságaid ja Yle Ođđasiid Sámis sáhtát maid guldalit Yle Areenas.
