Njuike sisdoaluide

Duojár lavttii divttaid dujiidasas – guldal mo litna sánit heivejit garra duodjái

Duodjeoahpaheaddji ja duojár Jouni S. Laiti smávva čájáhus ráhppojuvvui maŋŋebárgga Ohcejogas. Das lea sus ođđa jurdda, divttat ja duojit ovttas. Geahčči goit sakka liikui dán geahččaleapmái.

Duojár Jouni S. Laiti ja girječálli Niilo Aikio. Jávrri-Juhán Niillasis váibmu njuolga skálihii sadjái go son logai Jovnna divtta. Govva: Anja Kaarret / Yle

Ohcejogas álggii maŋŋebárgga nu gohčoduvvon Buorre miela vahkku (siirryt toiseen palveluun), ja dan olis Ohcejoga gielda ja Sámi oahpahusguovddáš lágidit iešguđetlágan bargobájiid, dáhpáhusaid ja čájáhusaid.

Duodjeoahpaheaddji ja duojár Jouni S. Laiti garraduojit leat oaidnin láhkai giliviessu Giissás Ohcejohnjálmmi márkanis. Čájáhusas son lea laktán divttaid dujiidasas. Ovtta duojis dikta lea ovttastahtton dolggiin ja čorvviin, maid Laiti lei váldán fárrui luomemeahcis.

– Dat orro leamen beroštahtti diŋggat, ja dasto mun das čohkken dakkár čájáhusoasi, muitala Laiti.

Doaimmaheaddji ja girječálli Niilo Aikio, Jávrri-Juhán Niillas lei okta guhte lei boahtán Buorre miela vahku rahpanávvudemiide. Dalán go son geahčai ja logai divtta, sus dego váibmu livčče mannan sadjái.

– Juogaláhkái dat lea mu váimmu lahka, ja liikon gal dien divttas. Dát čoarvi ja dolgi, dat leat sáhttán viidát johtit sámeluonddus, dat leat dego guoddán eallima. Dat muitalit olu, go dan álgá geahččat ja jurddašit, ákkastallá Jávrri-Juhán Niillas.

Duojár Jouni S. Laiti ovttastii bohcco čoarvvi ja dolggi oktan muitalussan. Son gávnnai daid jeakkis, ja dat hálahedje su. Govva: Anja Kaarret / Yle
Jouni S. Laiti divttas gullo čiekŋalis luondduoktavuohta. Makkár dikta de riegádii bohcco čoarvvis ja lotti dolggis? Guldal dá divtta ja Laiti jurdagiid. Gulat maiddái, maid Jávrri-Juhán Niillas jurddaša čájáhusa birra. Doaimmaheaddjin Anja Kaarret.

Jouni S. Laiti geahččaladdá vuosttaš háve dákkár ovttastahttima, ja son sávváge, ahte duodji ja dikta ságastallaba. Son lea juo ovdal addán namaid iežas dujiide, muhto dál dikta lea dego joatkka dien bargui.

Son válljii Giissá smávva čájáhussii dujiidis namalassii buorre miela ulbmilin. Sus gal leat maid njuolga provoserejeaddji duojit, muhto dál dát buorre miella lei bajimussan dán Buorre miela vahku áigge.

Ohcejoga Buorre miela vahku birra gulat lasi ságaid gaskavahku Dearvva-sáddagis.

Beaivvi ságaid ja Yle Ođđasiid Sámis sáhtát maid guldalit Yle Areenas.