Njuike sisdoaluide

Ánnejogas geahččalit dán gease ođđa rusttega ruoššaluosaid goddimii – diibmá godde duháhiid mielde ruoššaluosa

Norgga stáhta ruhtademiin Ánnejohkii leat háhkan ođđa bivdorusttega, mii galggašii bissehit ruoššaluosa goargŋuma johkii.

Ari Anttila jáhkká, ahte ruoššaluosaid mearri stuorru ain dás ovddosguvlui. Govva: priivaat
Guldal olles jearahallama dás. Jearahallan lea suomagillii.

Nuorta-Várjjagis Ánnejogas leat ráhkkaneamen bivdit ruoššaluosaid ođđa bivdorusttegiiguin.

Ruoššaluosat ledje diibmá giksin báikkálaš guolásteddjiide, ja daid goddege juobe duhát guoli ovtta jándoris. Báikkálaš guollebivdi Ari Anttila árvalusa mielde sii baste goddit eanáš oasi ruoššaluosain, muhto liikká báhce sullii duhát gođđuluosa.

Diibmá ruoššaluosaid bivde Ánnejogas ovdamearkka dihte luossatráhpain ja firpmiiguin. Ari Anttila muitala, ahte dál sii leat ožžon Norgga stáhtas ruhtadeami ođđa bivdorusttegii, man leat geavahan USA:s, Kanádas ja Alaskas luosa bivdimii.

– Rustet huksejuvvo doppe ja de dat boahtá midjiide suoidneborgemánus. Mii beassat jo geavahišgoahtit dan ja iskat, mo dat doaibmá, čilge Ari Anttila.

Dán lágan rusttet lea leamašan anus jo Etnejogas, Mátta-Norggas. Doppe leat geavahan dakkára, amaset šaddaduvvon luosat ja vilda luosat beassat gođđat. Rusttet doaibmá nu, ahte dat lea gitta joga botnis ja bajit oassi govdu čázi allodaga mielde. Rusttega áigot stellet nu, ahte dat manná olles joga rastá.

– Dat stivre luosaid dakkár gámmárii, ja de mii sáhttit loktet ruoššaluosaid eret ja luoitit Atlántta luosa badjelabbui johkii. Soađi ruoššaluosaid vuostá eat dainna vuoitte, muhto nagodat goit vehá geahpedit dan meari, mii deike Ánnejohkii goargŋu, čilge Anttila.

Ruoššaluosa áigot maid bivdigoahtit njuolga mearas.

Goddojuvvon ruoššaluosat šaddet borramuššan

Goddojuvvon ruoššaluosat eai goittotge mana duššás, go daid baicca vuvdet biebmun. Diibmá maid báikegoddelaččat ožžo viežžat daid nuvttá. Dál sii viggetge oažžut juoga nu lágan soahpamuša das, mii geavvá bivdojuvvon ruoššaluosaide, muitala Anttila.

– Gii nu oažžu viežžat daid guliid ja vuovdit daid, dahje de ieš geavahit daid mo háliida.

Anttila jáhkká, ahte ruoššaluosaid mearri stuorru ain dás ovddosguvlui go eai bastte áibbas juohke ruoššaluosa bissehit.

– Galhan dien mearis šaddet issoras mearri veajehat. Jagis 2023 ruoššaluosaid mearri boahtá leat logigeardásaš go maid dat lei diibmá, lohká Anttila.

Beaivvi ságaid ja Yle Ođđasiid Sámis sáhtát maid guldalit Yle Areenas.