Njuike sisdoaluide

Geahča video: Ahkeolbmot čoahkkanedje oktasaš riegádanbeaidoaluide Heahttái – Ailu Juuso mielas buoremus lei servvoštallan

Guovtte jagi bottu maŋŋá sáhtii Eanodaga searvegoddi fas bovdet boarrásut olbmuid ávvudit riegádanbeaivvi ovttas.

Sara-Ingá ja Ailu Juuso riegádanbeaivvi doaluin Eanodaga girkus ávvuipmilbálvalusas.
Eanodagas ávvudedje guovtte korona jagi maŋŋá boarrásut olbmuid oktasaš riegádanbeivviid.

Gárasavvonlaš Ailu Juuso lei helloduorastaga vuolgán eamidiinnis ávvudit ahkeolbmuid oktasaš riegádanbeaivvi Heahttái. Son devddii 75 jagi guovvamánus, ja boahtte jagi su guoibmi Sara-Ingá Juuso deavdá 70 jagi.

Ailu Juusoi buoremus ášši dáid riegádanbeaivvi doaluin lea servvoštallan.

– Dat lea dat deaivvadeapmi eará olbmuiguin, daid geaid ii oainne juohke beaivve.

Eanodaga searvegoddi lea ordnen moaddelot jagi boarrásut olbmuide oktasaš riegádanbeaivve feasttaid. Korona dihtii goit šadde doallat guovtte jagi bottu.

Dán háve feasttaide čoahkkanedje badjelaš 50 guossi. Feasttat álge helloduorastaga girkostallamiin ja lunddolaččat joatkašuvve searvegottedálus. Searvegotti diakoniijabargi Sointu Jokiniemis lei hušša olles beaivvi go son gozii, ahte buot manná nu mo gálgáge.

– Guovtte korona jagi áigge ii sáhttán ordnet riegádanbeaivvi doaluid, de olbmot leat váillahan, ja juos juoga váillahuvvo, de dalle dat lea leamašan mearkkašahtti, muittuha Jokiniemi.

Searvegotti diakoniijabargi Sointu Jokiniemi gohcá ahkeolbmuid riegádanbeaivvi doaluid Heahttás. Govva: Anneli Lappalainen / Yle

Riegádanbeaivvi ordnemii oassálaste sullii 20 eaktodáhtolačča. Jokiniemi háliida bajidit doaluid lihkostuvvamis erenomážit eaktodáhtolaččaid barggu.

– Buoremusat lea báhcán millii, go mis lea nu fiinna eaktodáhtolaččaid joavku, mii lea veahkehan daid ordnemiin. Okto dán ii sáhte ordnet, rámida Jokiniemi.

Sara-Ingá ja Ailu Juuso leaba guktot duhtavačča doaluide, go beasaiga gárvves borramušbeavdái ja seammás návddašit buorre prográmmas. Eaktodáhtolaččaid pop-up-goarra lávllui doaluin maiddái lihkusávaldaga suoma- ja sámegillii.

– Dat lea hui somás dovdu, go deike beassá nuvttá boradit, dajai mojunjálmmiin Ailu Juuso.

Sointu Jokiniemi muittuha, ahte lea stuorra illu go beassá ovttas boarásmuvvat ja iige dárbbaš čiegadit iežas agi.

Beaivvi ságaid ja Yle Ođđasiid Sámis sáhtát maid guldalit Yle Areenas.