Njuike sisdoaluide

Kesikyessi Kati Vuoriaro vuájá pargoost stuorrâ auto já motomeh imâštâleh tom

Ive 2022 aalgâst suullân 10 prosenttid kyermiautokoortâ omâsteijein láá nisoneh. Avveellâš Kati Vuoriaro vuojij tom jo 18-ihásâžžân.

Kati Vuoriaro
Kati Vuoriaro máttááttâlâi anarâškielâ Säämi máttááttâskuávdáást maaŋgâ ive tassaaš. Tääl sun piäsá kevttiđ pargostis sämikielâ ain tyelittälli. Kove: Sáárá Seipiharju / Yle
Kuldâl maid kesikyessi Kati Vuoriaro muštâl suu pargoost kirjeráájuauto vyeijen. Toimâtteijen Sáárá Seipiharju.

Avveellâš Kati Vuoriaro vuájá Aanaar kieldâst kirjeráájuauto. Sun algâttij čohčuv oppâsopâmušâin pargoost já tääl lii muáddi máánu vuájám ohtuu miätá kieldâ.

Vuoriaro vuojij jo 18-ihásâžžân C-koortâ ađai kyermiautokoortâ, já sun lijkkoo vyeijiđ stuorrâ autoin.

– Mun uáinám pyereest, ko čokkáám nuuvt paijeen. Tot lii tehálâš uáiniđ mii tábáhtuvá.

Nisonij meeri kyermiautokoortâ čođâlditteijein lii lasanâm iivij mield. Ain lii kuittâg saahâ syergist, mast pargeh eenâb almaah. Traficom statistiik mield ive 2022 aalgâst suullân 10 prosenttid C-, C1-, C1E- ja CE-vyeijimkoortâi omâsteijein láá nisoneh.

Maaŋgah kirjeráájuauto äššigâsah láá imâštâllâm tom, maht Vuoriaro tuástá vyeijiđ nuuvt stuorrâ auto.

– Munjin taat lii auto, siämmáánáál tot tuáimá, tast-uv láá stiivrâm já tuolmâmeh. Tot lii tuše stuárráb.

"Jis pala, te talle lii pyereeb ete ij vyeje"

Kati Vuoriaro lâi jo ovdil hárjánâm vyeijiđ stuárráb autoin, já suu siiviilauto-uv lii váhá stuárráb ko táválâš uccâ auto.

– Muu madâräijih eeđâi vuosmuu keerdi, ko ooinij tom muu auto, ete kale tot lii váhá liijkás stuorrâ auto nisonân. Mut tääl sun ij vissâ innig juurdâš, et muu auto lii nuuvt styeres, ko sun lii uáinám ko mun vuájám kirjebussi, Vuoriaro povvust.

Vuoriaro mielâst kuittâg oro lemin nuuvt, ete maaŋgah nisoneh paleh stuorrâ autoin vyeijim, veikkâ toos ij liččii tárbu.

– Ij taarbâš poollâđ, mutâ jis pala, te talle lii pyereeb ete ij vyeje. Láá ulmuuh kiäh paleh vyeijiđ aaibâs uccâ autoin. Mij lep ereslágáneh, smiättá Vuoriaro.

Yle Säämi Kesikyessi-rááiđu puáhtá kuldâliđ radiost jyehi vuossaargâ já meiddei Yle Areenast.

Ođđasamosat