Njuike sisdoaluide

Anára ja Gihttela gielddat áigot dál ovttas skáhppot ruđa Bohká geainnu divvumii – Geaidnu lea váralaš, dadjá Gihttela gielddahoavda

Dálá dilis eandalitge Bohká gili ja Gihttela Hanhimaa gaskasaš geaidnu lea heajos ortnegis ja biilavuoddjit bártidit dávjá jođedettiin geainnu.

Bohká geaidnu.
Bohká ja Köngäs giliid gaskkas ii leat asfálta. Eandalit giđđat ja geassesiivvuin geaidnu sáhttá leat hui roggái ja heajos ortnegis. Video: Xia Torikka.

Anára ja Gihttela gielddat plánejit Anára girkosiidda ja Gihttela Hanhimaa gaskasaš geainnu buorideami. Gielddat leat ráđđádallan geainnu buoridandárbbuid ja ovttasbarggu birra geassemánu álggus.

Nu daddjon Bohká geaidnu dahje geaidnu 955 Anára girkosiidda ja Gihttela gaskkas lea áidna máđija davimus Suomas, mii manná Nuorta-Sámis oarjjás ja ovttastahttá sámeguovllu gielddaid.

Giđđat Bohká geaidnu lea roggái, dimis ja váralaš johttit. Govva: Anni-Saara Paltto / Yle

Geainnu mielde johtet olu mátkkošteaddjit ja dat leage okta sivva, manne gielddat háliidit buoridit geaidnooktavuođa. Geainnu buorideapmi lea maiddái johtolatdorvvolašvuođa gažaldat, oaivvilda Gihttela gielddahoavda Jari Rantapelkonen.

– Juo logiid jagiid leamašan dárbu divodit dán geainnu. Geaidnu ii leat ortnegis ja dat lea váralaš, dadjá Rantapelkonen.

Anára ja Gihttela gielddat leatge soahpan ásahit bargojoavkku ovddidit geaidnoášši. Ášši leamašan ovdan goappaš gielddaid gielddaráđđehusain dán vahkus. Oktasaš bargojoavkku ulbmilin lea ovddidit geainnu buoridanplánaid ja sihkkarastit prošeavtta ruhtadeami.

– Go bargojoavku ásahuvvo, de mii guorahallagoahtit mo ášši doalvut viidáset. Anára bealde buorre ovdamearka lea Njellima geaidnu. Mii boahtit váldit oktavuođa stáhtii ja gal Johtolatlágádusas, johtolat- ja diehtojuohkinministeriijas ja ruhtaministeriijas lea mearkkašahtti sajádat das, ahte mo dán geidnui investerejit, dadjá Rantapelkonen.

Gihttela gielddahoavda Jari Rantapelkonen oaivvilda, ahte Suomas juolludit hejot geaidnoruđaid davás. Govva: Jyri Tynkkynen / Yle
Gihttela gielddahoavda Jari Rantapelkonen oaivvilda, ahte Bohká geaidnu lea váralaš. Doaimmaheaddjin lea Xia Torikka.

Anár gieldda gielddaráđđehusa ságadoalli Jari Huotari deattuha Ylen Aamu tv-sáddaga jearahallamis johtolaga dorvvolašvuođa buorideami ja dan, ahte dát ášši gullá gieldalaččaid ja eará geaidnogeavaheaddjiid vuođđobálvalusaide. Dasa lassin son máinnaša mátkeealáhusa dárbbuid.

– Dát geaidnu ovttastahttá guokte mearkkašahtti mátkeealáhusgieldda nappo Anára ja Gihttela, Huotari fuomášuhttá.

Huotari máinnaša Johtolatlágádusa investerenpláná, man mielde davás eai leat šaddamin stuorra investeremat. Danin jurddan livččii ovddidišgoahtit geainnu divuheami sierra fidnun.

Jari Huotari Inarin kunnantalon pihalla.
Geahča dás Jari Huotari jearahallama Ylen Aamu -sáddagis. Doaimmaheaddjin Xia Torikka.

Biilavuoddjit bártidit dávjá heajos geainnus

Dálá dilis Bohká ja Köngäs giliid gaskkas ii leat asfáltta, muhto biilavuoddjit šaddet vuojašit čievraluotta lagabui 60 kilomehtera. Eandalitge giđđat ja geassesiivvuin geaidnu sáhttá leat hui roggái ja heajos ortnegis.

Eanemusat heajos luottas gillájit báikkálaš biilavuoddjit, geat vudjet geainnu dávjá. Njunnáslaš Inker-Anne Magga johtá olu Anára ja Eanodaga gaskka ja lea bártidan máŋgii geainnu alde.

– Mus lea juvla mannan várra logenár háve dáid jagiid áigge. Muđuid ii leat biila cuovkanan, muhto rieggáid gal lean oba máŋgii šaddan duogŋat dan gaskkas, muitala Magga.

Njunnáslaš Inker-Anne Magga mielas lea buorre gullat, ahte geaidnoášši háliidit ovddidit. Govva: Anneli Lappalainen / Yle

Dálá dilis Hanhimaa ja Köngäs gaskasaš 13 kilomehtera guhkkosaš geaidnooasi leat divodeamen ja geaidnobargu galggašii gárvánit čakčii 2022. Stuorimus oassi Köngäs ja Bohkká giliid gaskasaš čievrageainnus báhcá goit divokeahttá.

Magga ii geassesiivvuin mielas vuolgge vuodjit Bohká geainnu.

– In šat gille geasseáigge vuodjit. Mun seasttán biilla ja iežan maid, go in stressaluva. Dat lea nu heitot dat geaidnu, oaivvilda Magga.

Anára ja Gihttela oktasaš plánat goit movttiidahttet geaidnojohtti. Magga mielas lea buorre gullat, ahte ášši háliidit ovddidit.

– Dieđusge mun sávan, ahte dan buoridit nu, ahte dan bastá vuodjit nu go juo geainnuid galgá nai, ahte ii dárbbaš ballat oba gaskka, ahte mannágo juvla dahje cuovkanago biila. Vaikko asfálttageainnu dahkat, muhto gal dat manná čievraluoddage, jus dat lea dikšojuvvon bures, dadjá Inker-Anne Magga.

Njunnáslaš Inker-Anne Magga johtá olu Anára ja Eanodaga gaskka ja lea bártidan máŋgii Bohká geainnu alde. Doaimmaheaddjin lea Xia Torikka.

Áššis lei sáhka Ylen Aamu -sáddagis Yle TV 1:žis gaskavahiđit.

Beaivvi ságaid ja Yle Ođđasiid Sámis sáhtát maid guldalit Yle Areenas.