Geasseeahket Avvila bálgosa miessemearkunbáikkis, Myeiđikurrâs, lea čoaskkis. Čuoika gal lea ollen Sápmái, dego juo láve dán muttus geasi, áiddo ovdal mihcamáraid.
11-jahkásaš Viivi Mikkola moddjesta, go dohppeha miesi iežas sallii. Sutnje bohccot leat agibeaivve leamaš dehálaččat. Son illuda geassái, go beassá miessemearkumiidda ja diehtá juo dál, ahte áigu joatkit dás duohkoge boazohommáid.
– Mu mielas fiinna miessi lea čuvgesruškat, mas lea vilges mearka oaivvis, govvida Mikkola.
De son diktá miesi ruohttat eret, ja vuot moddjesta.
– Misiin lea somámus kánske dat, go dat leat nu unnit, árvaladdá Mikkola.
Vaikko miessemearkumiin šaddet guhkes beaivvit, modji ii oro jávkamin avvillaš Suvi Kustulage baksamiin. Dán jagi álddut leat oalleláhkái miessái leamašan, árvala Kustula. Dehálamos lea dieđusge ieš merken.
– Mun vuorddán, ahte beasan merket, boagusta Kustula ilolaččat.
Miessemearkumiin lea Kustula mielas somá oaidnit misiid ja olbmuid, beassat háleštallat ja vel gohcit oppa ija.
Maiddái Avvila bálgosa stivrra lahttu Niko Kustula mielas miessemearkun lea okta dehálamos bottožiin jagis. Son lohká, ahte dat čohkke olbmuid oktii ja eandalitge dál koronaáiggi maŋŋá dat orru earenoamáš buorre. Go lea geahččan dán jagáš misiid, lea son dan oaivilis, ahte dat leat buori ortnegis ja miessedilli lea buorre.
– Lea somás dovdu, go leat miesit birra. Šaddá somás dovdu boahttevuođa ektui, ahte dát visot seailu, Niko Kustula lohká.
Beaivvi ságaid ja Yle Ođđasiid Sámis sáhtát maid guldalit Yle Areenas.
