Njuike sisdoaluide

Guldal jiena: Ohcejoga rihppaskuvlavázzit leat beassan ovttastallat ja tuvrrastallat seammás go leat oahppan kristtalašvuođa

Jonssotáigge lea áigi ráhkkanit rihppadoaluide. Gávttiid ja čiŋaid ordnemis lea olu bargamuš, muitala rihppaskuvlavázzi Áslak Ánde Syvänperä.

Neljä henkilöä seisoo rivissä ja yhdellä on koiras sylissä.
Ohcejoga rihppaskuvllas nuorat leat oahppan kristtalašvuođa lassin maid vehá čorget ja ovttastallat. Govas Márjá Sofe Länsman, Erva Niittyvuopio, Ville Orjala ja Áslak Ánde Syvänperä. Video: Susanna Guttorm / Yle
Guldal dás rihppaskuvlaságaid Ohcejotnjálmmis. Doaimmaheaddjin dás Susanna Guttorm.

Ohcejogas rihppaskuvlavahkku lea farga meattá. Rihppaskuvlavázzi Áslak Ánde Syvänperä liiko rihppaskuvlii, go doppe beassá deaivvadit skihpáriiguin.

– Dát lea somás leaira, dáppe oažžu skihpáriid ja beassá leat ovttas, son muitala.

Syvänperä mielas rihppaskuvlla vázzin lea dehálaš, go dalle oažžu náittoslobi. Rihppaskuvlla oahpu Syvänperä atná dehálažžan, go sus lea birra searvegoddi, nappo bearaš ja skihpárat.

Stuorut Márjá Sofe Länsman lea guđát geardde fárus rihppaskuvllas, ja son bargá gievkkana bealde.

– Mun lean doppe kohkken ja málestan, son muitala.

Jonssotáigge Ohcejogas ráhkkanit rihppadoaluide

Oulu bismagotti sámeáššiid čálli Erva Niittyvuopio lea eamidastimin rihppaskuvlla.

– Mis leamašan hirbmat somás vahkku. Dál leamašan hui somás joavku.

Sutnje rihppaskuvla leamašan dán vuoro vehá earálágan, go su bárdni lea maiddái mielde vázzimin rihppaskuvlla.

Nuoraidbargi Ville Orjala lea maiddái jođiheamen rihppaskuvlla. Orjala muitala, ahte sis leat leamašan leairras vaikko makkár doaimmat.

– Mii leat speallan, finaimet Nuvvos Áilegasas, oahppan rihppaskuvlaáššiid, Orjala logahallá.

Rihppaskuvlavázzit leat maiddái fitnan Ohcejot Áilegasa alde ja ijastallan girkus.

Ohcejogas jonssotáigge lávejit ráhkkanit rihppadoaluide. Konfirmašuvnna várás gorrot gávttiid ja ordnejit čiŋaid. Rihppaskuvlavázzi Áslak Ánde Syvänperäs leat čiŋat ruovttus vuordimin. Muhto álki gávttiid ja čiŋaid ordnen ii leat.

– Gal dat lea leamaš bargu, Syvänperä mieđiha.

Beaivvi ságaid ja Yle Ođđasiid Sámis sáhtát maid guldalit Yle Areenas.