Njuike sisdoaluide

Kozzsäpligeh puávtáččii leđe puáttee ive ennuv, jis säplignääli lii styeres já täälvi muotâtile lii pyeri

Tääl kozzsäpligeh iä lah oinum ennuv täälvi hyenes muotâtile tied. Majemuš kozzsäpligij juávkkuvandârdem tábáhtui ive 2011.

Kozzsäplig lii tergâdis purrâmâš ovdâmerkkân njaalâid. Govva: Yle/ Risto Salovaara

Kozzsäpligeh iä lah oinum vijdâsávtive 2011 juávkkuvandârdem maŋa. Meccielleitiettuu professor Heikki Henttonen muštâl, ete eidu tääl kozzsäpligeh iä lah meendu ennuv. Kozzsäpligij meeri mulsâšuddâm lii kuittâg viehâ táválâš, ige tast taarbâš leđe huolâst.

Säpligij meeri mulsâšuddâm mana suulân neelji ive poojijn. Henttonen muštâl, ete eidu tääl säpligij mulsâšuddâmpaje lii tom muddoost, ete säpligeh iä lah ennuv ađâi tääl vyeligâšpaje lii loopâst. Henttonen arvâl, ete puáttee ive puávtáččij leđe säpligij peeleest pyeri ihe.

Vâi kozzsäpligeh liččiij ennuv, te säplignääli ferttee leđe styeres. Eres säpligeh tuáimih tego arvesuáján kozzsäpligijd – piäđuid lii tuárvi purrâmâš säpligijn iäge toh taarbâš puurrâđ kozzsäpligijd.

Täälvi šoŋŋâdâh miäruštâl maht kozzsäpligeh piergejeh

Šoŋŋâdâhnubástus lasseed epitäsivis šooŋâid, moh vaigutteh kozzsäpligij miärán. Jis tälviv arvâ, lii pivvâlis já liegâsvuotâtileh mulsâšudeh ennuv, te muotâ vistig suddá já talle muotâkerdi jiäŋu nuuvt, ete kozzsäpligeh iä finnii purrâmâš. Iäge purrâmâšttáá pyevti lasâniđ.

Šadolâšvuođâ maaŋgâpiälálâšvuotân kozzsäpligeh vaigutteh ennuv, toh poreh tiätu šadoid já siähtálijd. Jis kozzsäpligeh iä lah ennuv, te tai purrâmušvááljun kullojeijee šadoh uážžuh šoddâđ ráávhust.

Šadoh, maid kozzsäpligeh iä puurâ, miäinástuveh talle ko kozzsäpligeh láá ennuv. Taat lasseed šadolâšvuođâ maaŋgâpiälálâšvuođâ, ko eres šadoh uážžuh vuáruttâllâđ šoddâmtiileest.