Ohcejoga beavttálmahtton bálvalusássanbáiki Dorvu ja seaŋgaossodat leat ožžon atnui sámi dujiid ja čuovgagovaid Ohcejoga guovllus boarrásiid várás.
Sámi Duodji -searvvi Sámekultuvrra dáiddan Ohcejoga dikšunlágádusaide -fidnu loahpahanávvudeapmi lágiduvvui gaskavahku 22.6. Ohcejoga rabasbálvalusguovddážis. Fidnu ollašuhttui oktasašbargun Ohcejoga gielddain ja Sámedikkiin, ja dan ruhtadii Suoma kulturfoanda.
Fidnu ulbmilin lea buktit buresbirgejumi Ohcejoga sápmelaš boarrásiidda dáidaga ja duoji hámis.
– Dát leamaš suohtas bargu álggu rájes. Leamaš suohtas, ahte boarrásiidda boahtá deike dakkár konkrehta, man beassá oaidnit, guoskkahallat ja geavahit, muitala Ohcejoga gieldda astoáiggečálli Kaisa Tapiola-Länsman.
Čuovgagovat ja duodji buktojuvvojit sápmelaš muitobuohcciid ja ahkeolbmuid olámuddui Ohcejoga beavttálmahtton bálvalusássanbáikki Dorvvus ja seaŋgaossodagas. Dáiddačuovgagovaid lea váldán dáiddár Marja Helander ja dujiid leat duddjon báikkálaš duojárat Antti-Piera Valle, Ilmari Tapiola, Rita Nurmenrinta, Eveliina Järvinen sihke Anáris Aune Musta ja Kristiina Ranttila.
Duojit bohtet árgabeai atnui
Ohcejoga gieldda dikšunbarggujođiheaddji Päivi Kontio ii vuos máhte muitalit makkár geavahussii duojit bohtet sidjiide, muhto lohpida ahte dat šaddet oassin sin árgabeaivvis.
– Mii fertet divššáriiguin ságastallat mo daid gieđahallat ja maid dujiid miige ossodat oažžu, muhto sihkkarit min doaimmajođiheaddji gávdná bottuid goas daid sáhttá geavahit.
Sámedikki kulturčálli Riitta Orti-Berg muitala, ahte álgojurdda dán fidnui vulggii jo jagis 2013, go Orti-Berg barggai Ohcejoga gieldda giellaovddidanbargguin.
– Fitnen dalle oahpásmuvvamin dán dállui, de bođii dakkár dovdu, ahte dáppe váilot govat ja duojit. Besset geahččat ja guoskkahallat daid, go eai šat veaje ieža duddjot. Ja govaid bokte fas máhccat vássán eallimii. Albmaláhkai áššit vulge ovdánit jagis 2020.
Beaivvi ságaid ja Yle Ođđasiid Sámis sáhtát maid guldalit Yle Areenas.
