Njuike sisdoaluide

Kia Olin lij ođđ sääʹmǩiõl uʹčteeʹl – alttad mättʼted Sääʹm škooultemkõõskõõzz da Sääʹmteeʹǧǧ sääʹmǩiõli ougglõsmättʼtõõzz virtuaalkuursin

Kia Olin alttad tuâjas sääʹmǩiõl uʹčteeʹlen čâhcca. Son mättat Sääʹm škooultemkõõskõõzz virtuaalkuursin da Sääʹmteeʹǧǧ sääʹmǩiõli ougglõsmättʼtõõzz pilotthaʹŋǩǩõõzzâst.

Kia Olin tuʹǩǩad jååʹtted Sääʹmjânnam luâđast. Govva: Kia Olin

Kia Olin lij Sääʹm škooultemkõõskõõzz da Sääʹmteeʹǧǧ sääʹmǩiõli ougglõsmättʼtõõzz ođđ sääʹmǩiõl uʹčteeʹl. Olin ij leäkku tuejjääm uʹčteeʹl tuâj ääiʹjben, leâša son lij kuuitâǥ haʹrjjtõõllâm tõn Čeʹvetjääuʹr škooulâst da Sääʹmteeʹǧǧ pilotthaʹŋǩõõzzâst, koʹst son ååʹn reâuǥškuätt.

– Feʹrttai pâi ǩiččlõõttâd, mäʹhtt tät mâânn. Tuäiv mieʹldd tuʹǩǩääm da mâânn puârast di silttääm še mättʼted, ceälkk Olin.

Kia Olin maainast suu sääʹmǩiõl mättʼtõõttmõõžž da mättʼtõõzz pirr.

Mättõõli vuõššân tâʹvvsääʹmǩiõl, teä haaʹlii fiʹttjed še nuõrttsääʹmǩiõl

Kia Olin lij šõddâm Nurmijärvist. Son puõʹđi Aanra vuõss vuâra pâʹjjel 10 eeʹjj mââiårra tuâj mieʹldd.

– Tõt-han leäi aivv ođđ pirrõs muʹnne. Vuâmmšem, što toʹben lie jiânnai ääʹšš, koid jiõm fiʹttjam puârast. Ouddmiârkkân sääʹmǩiõlid jiõm silttääm da sääʹmkulttuur še ij leämmaž nuʹt toobdâs muʹnne.

Olin kuuli, što Sääʹm škooultemkõõskõõzzâst vuäitt mättʼtõõttâd sääʹmǩiõlid da alttii mättõõllâd toʹben tâʹvvsääʹmǩiõl.

– Muʹst ij leäkku ni mii persoonlaž õhttvuõtt sääʹmǩiõlid. Smiõʹttem, što možât tâʹvvsääʹmǩiõll leʹčči pukin pueʹrmõs muʹnne, ko jäänab oummu kuuitâǥ mainste tõn da jeeʹres pääiʹǩin še.

Tâʹvvsääʹmǩiõl kuurs mâŋŋa Olin vuâmmši, što tõn vuâđald son fiʹttai še siõmmna aanrõšǩiõl, leâša nuõrttsääʹmǩiõl son ij fiʹttjam ni vooʹps.

– Smiõʹttem, što kâʹl mon haaʹleʹčem tõn še fiʹttjed da siltteed. Måtam eeʹjj tõʹst ooudårra oʹccem väʹst Sääʹm škooultemkõõskõʹsse lookkâd sääʹmǩiõl. Teʹl loʹǩǩem seämmast kuhttu tâʹvvsääʹm- da nuõrttsääʹmǩiõl.

Olin jueʹtǩi tâʹvv- da nuõrttsääʹmǩiõl mättʼtõõttmõõžž Ketterä-õllškooulâst, koʹst son še tuejjii uʹčteeʹl pedagooglaž määttaid. Teä son piâzzi Oulu universitetta mättʼtõõttâd sääʹmǩiõl vueiʹvvaunnsen. Son ij leäkku võl ǩiõrggnam valmštõõvvâd sääʹmǩiõl maisteeʹren.

– Muʹst lie võl väjja kueʹhtt kuurs da gradu. Jiõm leäkku muu graduoʹhjjeeʹja võl tuõsttâm mušttled, što muʹst ij leäkku ååʹn äiʹǧǧ ǩeeʹrjted tõn, pååǥǥast Olin.

Olin jäälast Äkäslompolost. Suʹst ij leäkku jiânnai äiʹǧǧ staarjõõzzid.

– Jõs muʹst lij âsttäiʹǧǧ, mon tuʹǩǩääm jååʹtted mieʹccest da tuõddrest õhttu leʹbe taaurõõžživuiʹm. Tälvva tuʹǩǩääm kâʹl čuõiggâd še.

Ǩieʹssluõvâsvuõđstes Olin jeäll suu puärrsi åʹrnn Saujj-Lääʹddjânnmest da piârrjes ǩieʹsspõõrtâst Parkanost. Son äigg še plaaneeškueʹtted ođđ tuâjas.

– Tät lij kuuitâǥ vuõss vuârr muʹnne nåkam tuâjast da puk ääʹšš lie aivv ođđâz. Tõn diõtt smiõʹttem, što ääiǥam kâʹl plaaneed juʹn ååʹn nuʹt, što teâđam siõmmna, mâid tuejjeed teʹl, ko škooul älgg påʹrǧǧmannust, särnn Olin.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.

Ođđasamosat