Njuike sisdoaluide

Komissára Hannele Pokka lea duđavaš, go duohtavuođa- ja soabadanproseassa joatkašuvvá – Sámediggi nammada ođđa komissáraid borgemánus

Go ođđa komissárat leat virgáduvvon, de bessetges ohcagoahtit ođđa váldočálli ja plánejeaddji.

Komissára Hannele Pokka vuorddaša jo ođđa komissáraid duohtavuođa- ja soabadankomišuvdnii. Govva: Vesa Toppari / Yle
Guldal Hannele Pokka jearahallama dás. Doaimmaheaddjin lea Linda Tammela.

Sámediggi mearridii ovdal mihcamáraid dievasčoahkkimisttis, ahte dat doarju sámiid duohtavuođa- ja soabadankomišuvnna joatkaga. Ulbmilin čoahkkimis lei nammadit guokte ođđa komissára earránan komissáraid sadjái. Sámediggi mearridii liikká maŋidit mearrádusdahkama ja áigu ordnet borgemánus liigečoahkkima gáiddusin nammademiid várás.

Komissára Hannele Pokka lea duđavaš dasa, ahte komišuvnna guhká plánejuvvon bargu beassá joatkašuvvat.

– Orru áibbas buorre mearrádus daninassii, ahte dát proseassa joatkašuvvá. Livččii várra váttis bidjat dan ođđasis johtui bottuid maŋŋá, son jurddaša.

Dál ii leat eará go vuorddášit dieđu das, geat ođđa komissáran válljejuvvojit, Pokka lohká. Son maiddái muitala, ahte hástalusain fuolakeahttá sii leat liikká bargan jámma, earret eará válmmaštallan áššiid, mat juo ledje barggu vuolde, ovdalgo earráneamit álge.

– Mii, geat dása lea báhcán, vuorddášit dan ahte beasašeimmet jo gullamiidda. Muhto lea áddehahtti, ahte gullamiiguin eat sáhte álgit, ovdalgo mii leat buohkat čoahkis.

Ovdal ođđa válljejumiid, bargguid dikšot golbma komissára ja guokte čálli. Go ođđa komissárat leat virgáduvvon, de bessetges ohcagoahtit ođđa váldočálli ja plánejeaddji.

– Das lea vejolaš rabas ohcama lassin maiddái bovdet virgái, Pokka fuomášuhttá.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat