Njuike sisdoaluide

Sámi geasis dáhpáhuvvá olu jaskes koronajagiid maŋŋá – loga makkár dáhpáhusat leat miehtá Sámi

Dán gease Sámis lágidit goit festiválaid, sohkadeaivvadeami, girkobeivviid ja árbevirolaš márkaniid.

Dán gease besset olbmot fas čoahkkanit ovttas návddašit musihkas Anára girkosiidii. Govva lea jagis 2017. Govva: Vesa Toppari / Yle

Guokte geasi leat mannan koronaepidemiijas. Dál viimmat besset iešguđetlágan dáhpáhusat čohkket olbmuid oktii miehtá Sámi. Dán artihkkalii leat čohkken muhtin festiválaid ja eará dáhpáhusaid, maid lágidit dán gease fas.

Suoidnemánus leat olu festiválat

Anáris Pride-dáhpáhus

Anár Pride lágiduvvo lávvardaga 2.7. Anára girkosiiddas. Pride olis ordnejit ráidovázzima, piknik ja open stage nappo friija lávddi, jus háliida loaiddastit.

Festiválat

Beskán Luossa Rock lágiduvvo Kárášjogas lávvardaga 2.7. diibmu 21.00–04.00 Norgga áigge. Doppe leat čuojaheamen earet eará Felgen Orkester ja Rolffa sihke juoigamin earet eará Johan Anders Baer. Dan lassin doppe lea stand up -oassi.

Midnattsrocken (siirryt toiseen palveluun) fas lea Leavnnjas 7.–9.7. Doppe leat dán jagi loaiddasteamen earet eará Keiino ja Rolffa.

Keiino-jovkui gullet Tom Hugo, Alexandra Rotan ja Fred René Buljo. Govva: Keiino

Eamiálbmotfestivála Riddu Riđđu (siirryt toiseen palveluun) lea 13.–17.7. Olmmáivákkis, Davvi-Romssas. Dán jagi artisttat festiválas leat earet eará Elin & TheWoods, The Halluci Nation, mii lei ovdal A Tribe Called Red, ja Ailu Valle + Amoc + Trio Boogiemen. Festivála álgá gaskavahku 13.7. diibmu 10 Norgga áiggis. Konsearttaid lassin doppe leat fállun maid filmmat ja seminárat.

Ailu Valle ja Amoc leaba loaiddasteamen ovttas Trio Boogiemen -joavkkuin dán jagáš Riddu Riđđus. Govva lea váldon jagi 2016 Ijahis ijas. Govva: Jouni Aikio / Yle

Máŋggadáiddat kulturdáhpáhus Väyläfestivála lágiduvvo 16.–24.7. Durdnosleagi guovllus gitta Gilbbesjávrri rádjái. Prográmmas (siirryt toiseen palveluun)leat konsearttat, diktaovdanbuktimat ja čuovgagovadáidda. Festiválas leat loaiddasteamen earet eará Niko Valkeapää ja Simon Issát Marainen.

Sámi festivála Márkomeannu (siirryt toiseen palveluun) lágiduvvo 28.–30.7. Gállogiettis Evenáššis. Dán jagáš artisttat festiválas leat earet eará Agnete, Slincraze, Felgen Orkester sihke Hildá ja Tuomas.

Sohkadeaivvadeapmi Kárášjogas

Guttormaid sohkadeaivvadeapmi lágiduvvo 9.–10.7. diibmu 12 rájes Kárášjogas. Lávvardaga lea jahkečoahkkin ja dan lassin maid soga historjjás muitala Aage Solbakk. Prográmmas lea vel goit govven ja ovttastallan. Sotnabeaivve lea galledeapmi hávdeeatnamii, gos muittašit jo vádjolan fulkkiid.

Rástegáisái 2022

Sirpmá valáštallansearvi lágida viehkama ja vázzima Rástegáisái (siirryt toiseen palveluun)16.7.2022.

Anárvahkut

Anárvahkut leat 22.–31.7. Vahku áigge lágiduvvojit iešguđetlágan dáhpáhusat miehtá Anára gieldda. Prográmmas (siirryt toiseen palveluun) leat goit konsearttat, teáhterčájáhusat, golledoidingilvu ja fanastuvrrat Anárjávrri ala.

Dan lassin Avvilis gilvalit mohtorgielkkáiguin čázi alde, Watercross-dáhpáhus lea 30.7.

Borgemánus leat goit Sámi girkobeaivvit ja Ijahis idja

Sámi girkobeaivvit

Sámi girkobeaivvit (siirryt toiseen palveluun) lágiduvvojit Anáris 5.–7.8. Dán háve girkobeivviid temán lea Bassi dolla – Bassi álbmot.

Sámiid konferánsa

Sámiid 22. konfereansa (siirryt toiseen palveluun)lágiduvvo Váhčiris 10. –14.8. Konferánssa fáddán lea Fámuidahttit Sámi. Sotnabeaivve 14.8. lea vel Sámiráđi girjjálašvuođabálkkašumi geigendilálašvuohta.

Sápmi Pride

Sápmi Pride 2022 lágiduvvo Johkamohkis 12.–14.8.

Ijahis idja -festivála

Eamiálbmogiid musihkkafestivála Ijahis idja lágiduvvo 19.–20.8. Anára girkosiiddas. Dán rádjai prográmmas (siirryt toiseen palveluun) leat almmustahttán guokte musihkkajoavkku, bearjadateahkedis lea Isák ja lávvardaga fas Intrigue lávddi alde. Festivála olles prográmma almmustahtto suoidnemánu álggus.

Intrigue-joavku Ijahis ijas jagis 2013. Govva: Sierge Rasmus / Yle

Márkanat

Vuohču Sámi márkanat leat 13.-14.8. Márkaniin vuvdet dujiid ja dan lassin doppe ordnejit maid ovdamearkka dihte bargočájáhusaid, njoarostangilvvuid ja sámi musihka konseartta.

Vuonnamárkanat leat Vuotnabađas, Unjárgga gielddas, 27.8. diibmu 11–17 Norgga áiggis. Doppe leat vuovdimassii duojit ja prográmmas lea maid musihkka.

Eará dáhpáhusat

Davi gievrramus 2022 -gilvu (siirryt toiseen palveluun) Ohcejogas 6.8. Gilvu lágiduvvo nuppe háve Ohcejoga girkosiidda falástallangiettis.

ČSV 50 jagi -ávvudoalut Sirpmás 13.8.

Sámi maraton Deanu šalddis 20.8.

Sáhtát cavgilit midjiide dáhpáhusaid birra šleađgapoastačujuhussii sami.radio(a)yle.fi.