Njuike sisdoaluide

Nallikari geasuha turisttaid Norgga bealde – Roy Wara lea fitnan doppe juo njealjje geardde jagi siste: "Oulu lea gávpot gos gávdno visot"

Nallikari sáttogáttit ja stuorra gávpot geasuhit olbmuid Norgga bealde. Girkonjárgalaš Roy Wara loaktá doppe nu bures, ahte lea fitnan doppe jeavddalaččat badjel logi jagi áigge. Olgoriikalaš turisttain sullii bealli leat dážat.

Nallikarin leirintäalue, useampi asuntoautoa ja -vaunua ovat rivissä
Girkonjárgalaš Roy Wara boahtá iežas campingvovnnain juohke jagi luomostallat Oulu Nallikarii. Nu son lea bargan juo badjel logi jagi.

Nallikari sáttogátti dovdat maiddái dážaid Rivieran ja máŋgasat atnetge dan sin fásta luopmosadjin. Juohke gease, erenomážit suoidnemanus, gohttensadji dievvá Norgga biillain ja campingvovnnain.

Girkonjárggalaš Roy Wara lea fitnan Nallikari sáttogáttiin mánnávuođa rájes. Dál son lea johtán Nallikari ja Girkonjárgga gaskka juohke jagi maŋimuš logi jagi áigge.

– Mii boahtit deike álo ruovttoluotta, go mii loaktit dáppe bures, muitala Wara.

Mátki Girkonjárggas Nallikarii ii leat guhki, dat váldá dušše logi diimmu, nappo ovtta beaivvi, muitala Wara. Soai láveba ovttas eamidiin fitnat dávjá luomus Oulus ja tuvrra áigge soai bisáneaba ovdamearkka dihtii Suoločielggis boradeamen gaskabeaivvi. Dát lea jo sudno njealját geardi Nallikaris jagi siste.

– Oulu lea gávpot gos gávdno visot, rábmo Wara.

Roy Wara loaktá bures iežas campingvovnnas ja Nallikaris. Govva: Ida Gronmo / Yle

Campingvovnnain sáhttá johtit birra jagi. Dat doallá bures lieggasa, eaige geassebáhkkasatge daga maidige. Wara guovttos boahtiba Oului dálvitge, vaikko olgun lea buolaš. Soai čohkkohallaba sudno tealttás, mii lea giddejuvvon campingvovdnii ja leaba háhkan oađđinseahkaid vuoi bivvaba čohkkohallat dálvit.

Wara guovttos orruba Nallikaris 2–3 vahkku, man maŋŋá soai máhccaba ruoktot ja vuolgiba fas ođđasit 2–3 vahkkui seamma sadjái. Dál sudnos lea maid bearaš ja mánáid mánát, geat leat vuolgán iežaset campingvovnnain mielde.

– Munnos lea buorre áigi go letne ealáhagas, čaibmá Wara.

Campingvovdnii sáhttá giddet tealttá, man siste sáhttá leat suoivanis. Govva: Ida Gronmo / Yle

Campingvovnnas gávdno visot. Doppe lea earet eará hivsset, riššu, seaŋga, tv, soffá, gievkkan, galbmaskáhpe ja uvdna, mas sáhttá ráhkadit vaikko pizza. Wara muitala, ahte soai liikoba fitnat tuvrrain ja danin sudnos leatge sihkkelat ja beana mielde.

Vaikko gielalaččat Ruoŧŧa livččii buoret molssaeaktu, ii Wara bearrašiinnis loaktán doppe seamma bures.

Wara goit šálloša, ahte lávggohat Eden lea gitta. Dan lassin mihcamáraid áigge Oulu gávpot ávžžuhii garvit vuojadeamis Nallikari mearas. Sivvan dasa lea alla enterokokki baktearaid mearri.

Fitnodatjođiheaddji vuordá buori geasi

Nallikari fitnodatjođiheaddji Sirpa Walter muitala, ahte dážat bohtet guossái erenomážit suoidnemánu áigge.

Idjademiid ollislaš mearri lea sullii 100 000 jagis. Olgoriikalaš guossit devdet dán mearis 35 proseantta, main dážat leat sullii 40–50 proseantta. Nappo gaskamearálaččat 14 000–17 500 dáža turistta fitnet luomostallamen Nallikaris jagis.

Korona jagit leat váikkuhan turisttaid mearrái. Jagis 2020 Norggas lei lohpi boahtit Supmii, nappo turisttat ledje bures, muhto geassit 2021 ráját ledje gitta, mii dihttui turisttaid mearis. Dál ráját leat goit rabas ja Nallikari fitnodatjođiheaddji Sirpa Walter vuordáge geasi 2022 buktit olu turisttaid Norgga bealde.

Girkonjárgalaš Roy Wara lea fitnan Oulu Nallikaris juohke jagi maŋimuš logi jagi áigge. Dán jagi Wara ovttas eamidiinnis leaba fitnan Nallikaris juo njeallje geardde.

Beaivvi ságaid ja Yle Ođđasiid Sámis sáhtát maid guldalit Yle Areenas.