Njuike sisdoaluide

Guldal jiena: Anne Lajla Utsi ja Amanda Kernell leaba válljejuvvon Oscar-gála ealligovaid válljejeaddji Academy lahttun

Sámi filbmainstituhta jođiheaddji Anne Lajla Utsi illuda das, ahte stuorra máilmmi lávddiin váldit dán áigge ain buorebut vuhtii máŋggabealatvuođa ja eamiálbmogiid obalohkái.

Internašunála Sámi Filbmainstituhta jođiheaddji Anne Lajla Utsi atná lahttuvuođa Academys stuorra gudnin. Su mielas dat lea dehálaš ánsu olles sámi filbmamáilbmái. Govva: Maren Benedicte Nystad Storslett/ISFI
Anne Lajla Utsi lohká dan ánsun olles sámi filbmamáilbmái.

Internašunála Sámi Filbmainstituhta jođiheaddji Anne Lajla Utsi ja Sameblod-filmmastis dovddus filbmabagadalli Amanda Kernell leaba válljejuvvon Academy lahttun.

Academy hálddaša The Academy Awards, man dovdat buorebut Oscar-gálan. Academy lea riikkaidgaskasaš organisašuvdna ja lahttun sáhttet ohcat buot filbmabagadallit miehtá máilmmi dahje olmmoš evttohuvvo dohko. Eaktun lea earret eará dat, ahte guokte lahtu guottihit lahttun ohcci. Lahttuvuohta bistá eallinagi.

– Go ožžon dieđu ja dan bovdehusa dohko, de ferten lohkat, ahte hirbmadit hirpmástuvven, dadjá Anne Lajla Utsi.

Sutnje dat lea stuorra gudni: leahan sáhka sajis, mas válljejuvvojit evttohasat Oscar-gálai – máilmme stuorámus filbmabálkkašupmái.

– Dat eai leat nu ollu olbmot geat bovdejuvvojit dohko, de dat lea hui stuorra ášši ja dáhpáhus, lean hui ilus dainna.

Maiddái sámi filbmadahkki Elle-Maija Tailfeathers gullá Academyi.

"Ánsu olles sámi filbmamáilbmái"

Anne Lajla Utsi muitala, ahte su mielas filbmamáilmmis lea maŋimuš jagiid mielde dáhpáhuvvan olu máŋggabealatvuođa ektui. Academyi gullet juo máŋgga eará eamiálbmoga ovddasteaddjit.

– Dat čájeha dan stuorra rievdama, mii lea dáhpáhuvvamen máilmmis, illuda Utsi.

Anne Lajla Utsi árvala, ahte das, ahte sámit leat mielde Academys, lea stuorra mearkkašupmi sámi filmmaid boahtteáigái. Son jáhkká, ahte ovdamearkka dihte ruhtademiid oažžun soaitá šaddat álkibun dán lahttuvuođa ánssus.

– Dat lea ánsu olles sámi filbmamáilbmái ja dan garra bargui, man mii leat ovttas bargan. Sámis leat nu olu čeahpes filbmadahkkit, Utsi dadjá.

Beaivvi ságaid ja Yle Ođđasiid Sámis sáhtát maid guldalit Yle Areenas.