Njuike sisdoaluide

Guldal jiena: Ođđa komissáraevttohasaid ohcan lea dál sámediggeáirasiid duohkin

Evttohusat sámiid duohtavuođa- ja soabadankomišuvnna komissárain eai leat vuos boahtán ovdan almmolašvuođas. Sámediggi lágida borgemánus badjelmearálaš čoahkkima ođđa komissáraid nammadeami várás.

Sámedikki ságadoalli Tuomas Aslak Juuso jáhkká, ahte áirasiin leat jo jurdagat vejolaš komissárain. Govva: Ville-Riiko Fofonoff / Sámediggi | Saamelaiskäräjät
Guldal dás olles jearahallama. Doaimmaheaddjin áššis Inger-Elle Suoninen.

Suoma Sámedikki ságadoalli Gáijjot Ánte Issáha Duommá, Tuomas Aslak Juuso muitala, ahte evttohasnamat sámiid duohtavuođa- ja soabadankomišuvdnii eai aŋkke vuos leat boahtán ovdan almmolašvuođas. Sámedikki dievasčoahkkin ovdal jonssoha mearridii, ahte Sámediggi doarju sámiid duohtavuođa- ja soabadankomišuvnna barggu joatkima.

Ođđa komissáraid fertejit válljet earránan komissáraid sadjái.

– Dat lea dieđusge ollu áirasiid duohkin gávdnat evttohasaid ja jurdagiid, ahte geaid galggalii válljet, Juuso muitala.

Son liikká jáhkká, ahte áirasiin leat jo jurdagat vejolaš komissárain.

– Sihkkarit doppe leat spekulašuvnnat ja jurdagat áirasiid gaskkas, son dadjá.

Dasa lassin Juuso muittuha, ahte ođđa komissáraid sáhttá maid evttohit.

– Dieđusge jus stivra dahje mun oaččon evttohusaid čálalaččat, nu mis goittotge stivra galgá boahtte vahku bearjadaga doallat stivračoahkkima. Ammahan stivra maid ságastallá, ahte jus leat evttohasat nu sáhttágo daid dasto almmuhit almmolaččat, son muitala.

Válljejumiid maŋŋá soabadanproseassa beassá joatkašuvvat

Juuso maiddái geažida, ahte dán háve áigetávval lea čavgadut go ovddit háviid.

– Dieđusge proseassa áigetávval hukse dakkár rámmaid dasa, ahte livččii dehálaš beassat ja geargat komissáraiguin maid oalle johtilit, vai dát proseassa beassá bures johtui, son fuomášuhttá.

Danin mearridiige dievasčoahkkin lágidit badjelmearálaš čoahkkima borgemánus gáiddusin ođđa komissáraid nammadeami várás. Dát lea maiddái danin, vai ruđalaš golut eai šatta liiggás.

– Mii leat gáiddusin, ahte golut eai dasto šatta, vai mii nagodit bissut bušeahtas.

Sámedikki stivračoahkkin dollojuvvo boahtte vahku bearjadaga, ja doppe mearridit dárkilis beaivemeari borgemánu čoahkkimii, muitala Juuso.

Beaivvi ságaid ja Yle Ođđasiid Sámis sáhtát maid guldalit Yle Areenas.