Njuike sisdoaluide

Arvedávgeleavggat libardit lávvordaga Anáris, gos lea Suoma davimus Pride-dáhpáhus – ordnemat ožžon vuordemeahttun olu doarjaga

Anára nuoraidráđi iežas ordnen olmmošvuoigatvuođadáhpáhus ollašuvvá ihttin lávvordaga, suoidnemánu nuppi beaivve. Doarjaga mearri leamašan vuordemeahttun.

Anár Pride čohkke olbmuid Anára márkanii ávvudit olmmošvuoigatvuođaid ja čalmmustahttit seksuála- ja sohkabeallevehádagaid. Govva: Ville-Riiko Fofonoff / Yle

Anára Pride ordnejuvvo ihttin lávvordaga, 2.7. Anára márkanis. Dego juo Pride-dáhpáhusain lávege, gullo dánge dáhpáhussii ráidovázzin. Dáhpáhusas leat Sajosa šiljus ráidovázzima maŋŋá earret eará piknik, musihkkaovdanbuktimat ja iešguđetlágán bargobájit.

Dán vahkus lea ávvuduvvon virggálaš Pride-vahkku Suomas. Pride-lihkadusain čalmmustahttojuvvojit olmmošvuoigatvuođat ja eandalit seksuála- ja sohkabeallevehádagat. Vahkku nohká stuorra ráidovázzimiidda ja ávvudoaluide, main stuorámus lea oaivegávpot Helssegis.

Anára nuorat mearridedje ieža ordnet Pride, vai seksuála- ja sohkabeallevehádagaid áššit šattašedje eambbo oidnosii gielddas. Dát lea vuosttaš Anár Pride, muhto Anáris lea ordnejuvvon Sápmi Pride jagis 2017.

– Oalle unna joavkun mii bargat dan, muhto gal das buorre boahtá, árvala okta ordnejeaddji, Nuoraidráđi lahttu Hilda Musta.

Eai máhttán vuordit sponsoriid

Anára nuoraidráđi nuorat leat bargan máŋggabealat seksuála- ja sohkabeallebajásgeassima ovddideami ovdii. Hilda Musta muitala, ahte ii máhte vuos vuordit maidege, go dáhpáhus ordnejuvvo dál vuosttaš geardde.

– Lean oaidnán, ahte olbmot leat vuordán dákkár dáhpáhusa ja leat ilolaččat, ahte lea boahtimin dakkár. De gal dohko várra oalle olu olmmoš boahtá, sávvamis lea buorre dálkige, Musta dadjá.

Aino-Maija Mäenpää, Emma Saari, Kaisla Suominen ja Hilda Musta leat bargan Anára nuoraidráđis máŋggabealat seksuála- ja sohkabeallebajásgeassima ovddideami ovdii. Govva: Xia Torikka / Yle

Dáhpáhusas leat sullii logi eaktodáhtolaš bargi. Musta lohká, ahte sii leat ožžon maiddái sponsoriid dahjege ovttasbargoguimmiid dáhpáhussii.

– Eat mii vuordán, ahte mii oažžut daid. Dušše smiehtaimet, ahte dás boahtá dakkár unna dáhpáhus, mas ii livčče hirbmat olu mihkkige. Das goittotge šattai stuorát go jurddašeimmet, muitala Musta.

Beaivvi ságaid ja Yle Ođđasiid Sámis sáhtát maid guldalit Yle Areenas.

Beaiváduvvon 1.7. dii. 9.31: Divvojuvvon dáhpáhusa beaivemeari.
1.7. dii. 10.10: Dárkilmahttojuvvon, ahte dáhpáhusa ordnejeaddjit gullet Anára nuoraidráđđái.