Njuike sisdoaluide

Lappi gearretriekti hilggui áššáskuhttimiid guolástusrihkkumušain Anáris ja Ohcejogas: guolástusráddjehusat ruossalassii sámiid vuođđorivttiiguin

Guokte anárlaš almmáiolbmo sivahuvvuiba guolástan lobiheamit dahje fuollameahttunvuođas Juvdujoga Vyelemuškuoskâs ráfáidahttináigge. Ohcejohkalaš almmáiolmmoš fas sivahuvvui guolástan golbmii lobiheamit dahje fuollameahttunvuođas Ohcejohleagis.

Anára guolástusrihkusáššit guske guolásteapmái Juvdujogas. Govva: Sara Wesslin / Yle

Lappi gearretriekti lea hilgon áššáskuhttimiid lobihis guolástusrihkkumušain, mat leat dáhpáhuvvan Anáris geassit 2020 ja Ohcejogas geassit 2018. Gearretriekti attii otne bearjadaga 12.8. guokte duomu guolástusrihkusáššiin. Ovtta duomu guolástusrihkusáššis gearretriekti attii jo 8.7.

Guokte anárlaš almmáiolbmo sivahuvvuiba guolástan lobiheamit dahje fuollameahttunvuođas Juvdujoga Vyelemuškuoskâs borgemánus 2020 ráfáidahttináigge.

Meahciráđđehusa guolástusgohccit ledje Juvdujoga Vyelemuškuoskâs gohcimin guolástusa 1.8.2020 diibmu 1.00, go fuomášedje guokte albmá guolásteamen stákkuiguin ja dolgevuokkaiguin. Vyelemuškuoskâs lea Anára guolledoalloguovllu guolástannjuolggadusaid mielde ráfáidahttináigi 1.8.2020 diibmu 0.00 rájes.

Albmá guoktá leaba dovddastan, ahte leaba guolástan stákkuiguin ja dolgevuokkaiguin Vyelemuškuoskâs, muhto šiitiba ahte livččiiga oggon guolástannjuolggadusaid vuostásaččat ja šiitiba maid sivahusa rihkkosii.

Soai leigga guktotge máksán guolleváriiddikšunmávssu jahkái 2020 ja maiddái skáhppon jahkái 2020 Meahciráđđehusas Anára gieldalačča johkalobi stággobivdui, mii addá vuoigatvuođa guolástit johkaguovllus guolástannjuolggadussii čállon guolástanáiggiid mielde.

Áššáskuhtti gáibidii albmá guoktái 16–20 beaivesáhku.

Anárlaš albmá guoktá sivahusaid hilgumis guovttelágan sivat

Bearjadaga 12.8. addon duomus áššáskuhtton anárlaš albmá sivahusat leat hilgojuvvon. Mearrádus ákkastallo dainna, ahte guolástanráddjehus lea ruossalassii vuođđolágas sámiide dorvvastuvvon kultuvrralaš vuođđorivttiiguin.

Áššáskuhtton almmái lei iežas vástádusas gearretriektái gáibidan sivahusaid hilguma dainna ákkain, ahte son lea báikkálaš sápmelažžan guolástan árbevirolaš guolástanbáikkiin ja ahte vuođđolágas lea sutnje dorvvastuvvon vuoigatvuohta doalahit iežas kultuvrra.

Nuppi anárlaš albmá áššáskuhttimat hilgojuvvojedje jo 8.7. addon duomus. Dalle gearretriekti ákkastalai mearrádusa dainna, ahte Anára guolástusguovllu guolástanráddjehusa lea sáhttán dulkot, ahte guolástus lei ráddjejuvvon dušše suoidnemánu maŋimuš beaivve rádjái, ja borgemánu 1. beaivve guolásteapmi lei lobálaš. Almmái lei máksán guolástanlobi gitta 31.8.2020 rádjái.

Guktuin dáhpáhusain gearretriekti mearridii stáhta máksit áššáskuhtton albmáide gearretgoluid.

Ohcejohkalaš almmái oažžu firpmiidis ruovttoluotta

Okta ohcejohkalaš almmáiolmmoš fas sivahuvvui guolástan golbmii lobiheamit dahje fuollameahttunvuođas Ohcejohleagis. Vuosttas navdojuvvon guolástanrihkkumuš lea dáhpáhuvvan suoidnemánus 2017, nubbi ja goalmmát geassemánus 2018.

Vuosttas dáhpáhusas ohcejohkalaš almmáiolmmoš lei fierpmástallan Čársejogas báikkis, gokko guolásteapmi lea gildojuvvon. Nuppi ja goalmmát dáhpáhusas almmái lei fierpmástallan Geavojávrris báikkis, gokko ii oaččo bivdit firpmiiguin.

Almmái lea dovddastan guolásteami, muhto šiitá rihkkosiid dainna ákkain, ahte su dálu vuođđudanáššegirjjis leat nannejuvvon guolástanvuoigatvuođat Čársejohkii ja Geavojávrái.

Áššáskuhtti gáibidii albmái unnimustá 20 beaivesáhku ja rihkusgaskaoami nappo fierpmi manaheami stáhtii.

Vuosttas ášši oasil Lappi gearretriekti gávnnahii geassemánus, ahte áššáskuhttinvuoigatvuohta lea boarásmuvvan.

Nuppi ja goalmmát áššis addui duopmu 12.8.2022, man mielde áššáskuhttimat hilgojuvvojit. Gearretriekti ákkastallá duomu dainna, ahte guolástusráddjen Deanu oalgejogain lea ruossalassii vuođđolágain, mas dorvvastuvvojit sámiid kultuvrralaš vuođđorievttit.

Duomus mearriduvvo, ahte albmás duoguštuvvon fierpmi galgá máhcahit ruovttoluotta ja stáhta galgá máksit áššáskuhtton albmá gearretgoluid.

Beaivvi ságaid ja Yle Ođđasiid Sámis sáhtát maid guldalit Yle Areenas.