Njuike sisdoaluide

Guldal jiena: Anne Nuorgam lea miehtan komissáraevttohassan sámiid duohtavuođa- ja soabadankomišuvdnii

Jus Nuorgam válljejuvvo komissáran, de son guođđá Sámedikki stivralahttuvuođa, muhto joatká sámediggeáirrasin.

Anne Nuorgam leamašan guhká mielde sámepolitihkas. Govva: Marja Väänänen / Yle
Dá gulat Anne Nuorgam olles jearahallama. Doaimmaheaddji Inger-Elle Suoninen jearahallá.

Sámedikki áirras ja stivralahttu Anne Nuorgam muitala, ahte son lea miehtan álgit komissáraevttohassan sámiid duohtavuođa- ja soabadankomišuvdnii.

– Go smiehtaimet komišuvnna joatkaga, de bođii dakkár gažaldat, ahte álggášingo. Mun smihtten, ahte maninbat ii, danin ahte lea dehálaš, ahte doppe leat sápmelaččat.

Nubbin sivvan Nuorgam namuha dan, ahte son oaidná dehálažžan komišuvnna barggu ja luohttámuša huksema sámeservodahkii.

Son árvala, ahte komišuvnna barggus sáhtášii leat ávki su vásáhusain sámeservodagas ja ON bissovaš foruma jođiheaddjin, man olis son lea oahpásmuvvan iešguđet duohtavuođa- ja soabadankomišuvnnaid doaibmamii miehtá máilmmi.

Áigu guođđit stivrra, muhto ii Sámedikki

Jus Nuorgam válljejuvvo, de son guođđá Sámedikki stivralahttuvuođa, muhto joatká sámediggeáirrasin. Stivralahttuvuođa son guođđá danin, go stivra dahká daid geavatlaš doaibmanmearrádusaid ja politihkalaš mearrádusaid.

– Sámediggelahttuvuođas mun in jáhke leat miige hehttehusaid, danin go lea goittotge dehálaš, ahte lea liŋka dán guovtti orgána gaskkas.

Nuorgam lohká, ahte son oaidná sihke kommišuvnna ja Sámedikki institušuvdnan ja ahte sii barget institušuvnnaid ovdii eaige persovnnalaččat.

"Sorjjasmeahttunvuođa sáhttá ipmirdit máŋgga láhkai"

Duohtavuođa- ja soabadankomišuvnna mandáhta mielde komišuvnna lahtut leat viiddis luohttámuša návddašan olbmot sápmelaš ja suopmelaš servodagas. Lahtut leat sorjjasmeahttumat, eaige ovddas dan beali, mii sin lea evttohan dahje válljen.

Nuorgam lohká, ahte sorjjasmeahttunvuođa sáhttá ipmirdit máŋgga láhkai. Son dadjá, ahte Suoma bealde lea nu uhca sámeservodat, ahte iešguđet sápmelaš, geas lea guhkit áigge vásáhus servodagas, lea leamašan muhtin dási politihkar.

– Dieđusge sorjjasmeahttunvuohta dárkkuha dan, ahte kommišuvdna ieš beassá mearridit, maid dat bargá. Ii leat miige eará orgána dahje institušuvdna, mii dasa váikkuha, muhto ovttasbarggu sáhttá dahkat.

Stáhtaráđđi nammadii bealistis komišuvdnii ovddeš ministara ja Anne Nuorgam jearráge, ahte manin sápmelaččat eai sáhtáše dahkat dan seamma.

– Mu mielas dát gáibádus sorjjasmeahttunvuođas, mii mis leamašan, lea dakkár, ahte galgá gávdnot olmmoš, gii dovdá servodaga, muhto gii ii leamaš mange lágan doaimmas, de dat lea leamaš álggu rájes juo boastut.

Sámediggi galgá borgemánu liigečoahkkimisttis válljet ođđa komissáraid earránan komissáraid sadjái. Miessemánus guokte Sámedikki nammadan komissára celkkiiga iežaska eret luohttámušdoaimmasteaskka. Komišuvnnas jotket ain stáhtaráđi ja Nuortalaččaid siidačoahkkima válljen komissárat.

Beaivvi ságaid ja Yle Ođđasiid Sámis sáhtát maid guldalit Yle Areenas.