Njuike sisdoaluide

Kuldâl jienâ: Aanaarliih láá jo kuhháá halijdâm kuundán ellei röntgenruustig – tääl kundá hommááškuát tom Avelân

Kundá ij uásti röntgenmaašin, peic laigut tom ja taarbâš taan ihán ruuđâ toos 15 000 eurod.

Sosiaal- já tiervâsvuođâ jođetteijee Jaakko Seppänen tuáivu, et ellei röntgen toimâ piäsá joton Avelist jotelávt. Govva: Sara Kelemeny / Yle
Jaakko Seppänen muštâl ellei röntgenpiergâsij hommáámist kuundán.

Aanaarkundáliih láá jo kuhheeb ääigi halijdâm elleid röntgenpiergâsijd. Tääl váldustivrâ lii mieđettâm 15 000 eurod taan ihán sosiaal- já tiervâsvuođâ lävdikoodán tai piergâsij hommám várás.

Sosiaal- já tiervâsvuođâjođetteijee Jaakko Seppänen muštâl, et kundáhaldâttâs lii meridâm, et kundá laigut puoh tágárijd tipšompiergâsijd, meid ellei tipšompiergâsijd, ige uásti taid olssis. Talle ij taarbâš kevttiđ tállán stuorrâ ruttâsume uástimân.

Ovdâmerkkân tággáár röntgenruustig máksá nyevt 40 000–50 000 eurod. Tääl láá reknistâm, et taan ihán tarbâšičij 15 000 eurod.

– Eennâmpargoid mana tien summeest mottoom tuhháát eurod, lááigun loppâ já puátteevuođâst šleđgâ já eres toimâkoloh piäijojeh budjet toimâmkoloid, muštâl Seppänen.

Röntgenpiergâseh puátih elleetuáhtár táálu šiiljon. Tohon puáhtoo kontti, kuus rustigijd piejih. Ij lah mihheen jiermid tooimâ pieđgiđ maaŋgâ sajan, muštâl Seppänen.

Iä keevti elleisuojâlemseervi čoggim ruuđâ

Taat lii pyeremus vyehi tääl, ko elleetuávtirpalvâlusah tai tiäđuij mieldi sirdojeh tolemustáá 2026 ive aalgâs iäskán Pyereest piergim kuávlui vuálá. Meid taan kuávlust päikkiellei meeri lii lasanâm. Uástupalvâluskin ij lah pyeri vyehi, já ko ij lah lope kevttiđ ulmuid já elleid siämmáid mašinijd, te kundá laigut tääl olssis taan maašin.

Elleisuojâlâmservi lii čuággám ruuđâ taan röntgenruustig hommám várás, mut taid ruuđâid iä keevti taas. Kundá hommáá taid rustigijd jieš, te tot pasta meid talle meridij taid.

– Servi puáhtá talle kevttiđ taid ruuđâid eres tooimâid, veik ellei hävdieennâm viijđedmân, mast lii lam meid saahâ, iätá Seppänen.

Kuldâl lase anarâš saavâid tääbbin.

Ođđasamosat