Njuike sisdoaluide

Keejâ kuuvijd vuossâmuš Aanaar Pridest: Uárnejijeeh vuordii tuše váhá uásálisteid, mut uásálistei stuorrâ meeri olâttij

Vuossâmuš Aanaar Pride-tábáhtus lâi moonnâm oho lávurduv. Pakkâ šoŋŋâ, myevvireh já äijihšoŋŋâ iä vyeledâm ulmui ilo já juhlemielâ.

Inari Pride kulkue. Etualalla olevat nuoret pitelevät sateenkaarilippua ja kylttiä.

Maailm vuossâmuš Aanaar Pride lâi moonnâm oho lávurduv. Peiviv lâi uáli jo pakkâ šoŋŋâ, mut tot ij vaibâdâm ulmui moovtâ. Ulmuuh ožžuu juhliđ Aanaar Pride ráávhust. Áinoo, mii hettij, lâi maaŋgah myevvireh já äijihšoŋŋâ, mii elâččij Anarist uánihis mohe.

Ráiđuväzzimjuávkku vazzii Aanaar sijdâ čoođâ siämmást ko huikkii: "Rähisvuotâ kulloo puohháid!" já eres eđâlduvvâid, moh lahteh seksuaal- já suhâpeeliucceeblovo täsiáárvun. Maaŋgah autoh, moh vuoijii lappâd čuojâttii toorvijd toorjuu merkkân, já tot ilosmitij ráiđuväzzeid.

Anaar Pride- ráiđuväzzimjuávkku vazzii Aanaar sijdâ čoođâ. Govva: Sáárákáisá Seurujärvi / Yle

Ráiđuväzzim maŋa Sämikulttuurkuávdáš Sajos alda lâi Aanaar Pride tábáhtuspäikki. Ustevjuávkku čokottâl piknikloovdâ alne. Sij lijjii puáttám Suáđikyläst, já taat lâi sii vuossâmuš Pride-tábáhtus. Isabella Aikio-Hite muštâlij, ete sij huámmášii sosisaallâš media peht, ete Anarist lii Pride. Sij meridii puáttiđ Anarân juhliđ já telttâreeisun.

Ustevjuávkku poođij Suáđikyläst Aanaar Priden, ko sij halijdii uániđ Lappilâš Pride. Govva: Sáárákáisá Seurujärvi / Yle

Pottumaa ry tollij kähviteeltâ Pridest já huolâttij, ete ulmuuh mušteh juuhâđ sehe puurrâđ pakkâ šooŋâst. Mila Leppälä lii Pottumaa ry jeessân, já taat lâi nubbe Pride-tábáhtus kost sun lii lamaš.

– Tääbbin láá ucceeb ulmuuh ko Ruávinjaargâ Pridest, mut ulmuuh láá uáppáseh já tääbbin lii pyeri já lieggâ tobdo, Leppälä mainâstij ilolávt.

Aanaar Pride lii Mila Leppälä nubbe kerdi Pride tábáhtusâst. Sun lijkkuu, ko ulmuuh láá uáppáseh, tábáhtuumeest lii lieggâ já pyeri tobdo.
Pottumaa ry evvisteeltâst finnii kolmâ juhâmâš mon Adriana Sanz lâi jieš porgâm suu eeji raavâin. Govva: Sáárákáisá Seurujärvi / Yle
Kárvutâttâm Pridest lâi ivnáás. Govva: Sáárákáisá Seurujärvi / Yle

Pavlo Heikkinen aalgij Aanaar Pride rijjâtátulâžžân tállán ko sun kuulâi, ete tagarijd lii tárbu. Sun smietâi, ete Aanaar Pride lii áinoošlajâsâš tábáhtume já sun haalijd porgâđ maid peri puáhtá.

– Pride lii prooteest já taam tábáhtus ain taarbâš. Kiähnii sättih ettâđ, ete Pride ij taarbâš, mut tot ij lah tuotâ. Mij lep tääbbin, mij lep ain lamaš tääbbin já mij lep tääbbin ain puátteevuođâst-uv, Heikkinen muštâlij.

Pavlo Heikkinen lii lamaš maŋgii Helsinki Pridest já suu mielâst Aanaar pride lii uáli jo áinoošlajâsâš. Govva: Sáárákáisá Seurujärvi / Yle
Kuldâl maid Pride meerhâš Pavlo Heikkisân.
Aanaar Pridest oinui meiddei máccuhijd. Govva: Sáárákáisá Seurujärvi / Yle

Peeivi ohtâ ohjelm lâi Strike a pose -pargopääji, mon Janita Rantanen jođettij. Sun mainâstij, ete suu pargopääji lii finnim inspiraatio vogue tánssáámist, mii lii šoddâm New York Harlem ballroom kulttuurist.

Strike a pose -pargopääji lihâttiđ ulmuid já adelii rijjâvuotâ tánssáđ. Govva: Sáárákáisá Seurujärvi / Yle

Rantanen huuihij ain muusik mield: "pose!", talle ko lâi äigi poseeristiđ. Uásálisteeh ožžuu meiddei rekvisiit tánssám várás.

Suáđikyläst puáttám Amandaid čuojâttij tánssámmuusik, mii tánssááttij Pride juhloid. Pride-peivi nuuvâi open stagen, kost kii peri uážui čuojâttiđ já sárnuđ maid halijdij.

Aanaar nuorâirääđi jesâneh Kaisla SuominenHilda Musta lává lamaš orniimin Aanaar Pride-tábáhtus. Suoi lává iloliih, ete taat tábáhtus luhostui pyereest.

– Mist lâi vissâ tággáár juurdâ, ete teehi puátih tuše suulân kyehtlov olmožid, mut teehi pottii-uv vissâ suulân vitlov teikkâ čyeti olmožid, Suominen mainâstij.

Kaisla Suominen já Hilda Musta láin tuđâvááh Aanaar Priden. Govva: Sáárákáisá Seurujärvi / Yle
Kuldâl maid Kaisla Suominen já Hilda Musta muštâleh.

Pride meerhâš ulmuid rijjâvuođâ já čiävláávuođâ leđe taggaar ko lii já seksuaallâš sundâšumei já suhâpeelij täsiáárvu.

Ođđasamosat