Njuike sisdoaluide

Olbmot leat šaddan geahpedit geasseluopmoplánaid, go boaldámušhaddi lea nu garas – "Avvilis lea guhkes mátki Suoma beallemuddui, de ii bastte vuolgit"

Geasi maŋŋá sáhttá árvvoštallat dárkilut, man olu boaldámušaid divrun lea váikkuhan olbmuid geasseluomuide. Gažadandutkamuša mielde suopmelaččat eai áiggo johttit biillaiguin nu guhkes mátkkiid ja maiddái avvillaš Tanja Akujärvi lohká, ahte galggai šluhttet mátkeplánas oalát.

Eanemus olbmot leat geahpedan friddjaáiggi johtima ja dasa gullá maid ovdamearkka dihte fulkkiid galledeapmi. Govva: Mikko Koski / Yle

Boaldámušaid divrun váikkuha maid geasseluomuide. Máŋggat bearrašat leat hárjánan johtit geasseluomuin biillain, muhto leat dán geasi galgan smiehttat ášši nuppádassii, go boaldámušat lea divron nu sakka.

Avvillaš Tanja Akujärvi lohká, ahte boaldámušhatti divrun lea váikkuhan olu su geasseluopmoplánaide.

– Buot plánat, ahte livččen fitnan deaivvadeamen fulkkiid ja skihpáriid, de eai lihkostuvvan, lohká Akujärvi.

Son galggai de rievdadit plánaidis oalát.

– Avvilis lea guhkes mátki Suoma beallemuddui, de ii bastte vuolgit, Akujärvi dadjá.

Fintraffic lea dagahan gažadeami Ekonomiijadutkamušain (su. Taloustutkimus), mas čielgá, ahte juobe 43 proseantta olbmuin lea geahpedan biillavuodjima álgojagi. Dasa leat sivvan boaldámušaid garra hattit. Eanemus olbmot leat geahpedan friddjaáiggi johtima ja dasa gullá maid ovdamearkka dihte fulkkiid galledeapmi.

Geasseluopmomátkkiid áigot oanidit ja geahpedit

Váikkuhanhoavda Mikko Saariaho Fintrafficas muitala, ahte johtolatmearit Lappis eai leat aivve máhccan loguide, mat ledje ovdal koronapandemiija.

– Badjel goalmmádas suopmelaččain muitala, ahte boaldámuša divrun váikkuha maiddái geasseluopmoplánaide. Njealjádas vástideaddjiin fas logai, ahte áigot oanidit geasseluopmomátkkiid ja mátkkiid meari geahpedit, čilge Saariaho.

Saariaho lohká, ahte geasi maŋŋá de oaidnit, leatgo olbmot doaibman nu mo leat gažadeapmái vástidan.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat