Anárlaš duojár Máhteš Ovllá Arto Irina, Irina Saijets lea válljejuvvon Lásságámmi vuođđudusa prošektii, man namma lea The Vuogas Way: Sániidkeahttá hállat. Prošektii leat válljen ovcci duojára Suomas, Ruoŧas ja Norggas.
Dán jagi fáddán lea dipmaduodji. Saijets lea okta golmma duojáris, geat bohtet Suoma bealde.
– Dat lei hirbmat gelddolaš, ahte inhan mun lean oba vuordánge dákkár bovdehusa, son dadjá.
Bovdejuvvon duojáriid joavkkus leat maiddái earret eará Nelly Anna Engström, Katarina Spik Skum, Ramona Salo ja Anna-Stina Svakko.
Saijets muitala, ahte bovdehus lea sutnje stuorra gudni. Bovdehusa prošektii son oaččui ovdal jonssoha. Saijets lei áigon geasi váldit gulul, muhto dál son fertege doapmagoahtit.
– Das ii leat hirbmat ollu áigi báhcit smiehttat, ahte ferte álgit doapmat.
Saijets duddjo eanemus goikkehiid ja gahpiriid. Dain son lohká iežas leat čeahpimus.
– Muhto gal mun liikon duddjot maiddái sistedujiid, eará guolgadujiid ja dien diekkáriid. Ja čuoldinduojit leat maiddái, son muitala.
Duodji leamaš sutnje álo lunddolaš
Duodječeahppi máhttá viidát iešguđet duodjesuorggi dujiid. Saijets gulláge beakkán Láidde duodjesohkii, dárkilabbot Lená-Mihku dahje Ándaras-Máreha maŋisboahttiide. Danin duodji ja duojárvuohta leamašan sutnje álo lunddolaš.
– In mun várra riekta leat moge válljen, ahte dat lea leamaš dakkár lunddolaš sirdašupmi.
Saijets Instargam-konttus (siirryt toiseen palveluun) beassá oaidnit su hutkáivuođa dujiiguin. Son lea duddjon feara maid. Muhto vel gávdno juoidá, maid son ii leat šaddan duddjot. Saijets niehkun lea duddjot gietkama, go dat ovttastahttá máŋga iešguđet duoji ja duojesuorggi.
– Das leat sisteduojit, čuoldinduojit, muorraduojit, čoarveduojit, buot diekkárat, Saijets logahallá.
Lásságámmi vuođđudusa The Vuogas Way: Sániidkeahttá hállat -prošeavtta duojit čájehuvvojit Márkomeanus 29.–30. suoidnemánu.
Beaivvi ságaid ja Yle Ođđasiid Sámis sáhtát maid guldalit Yle Areenas.
